Datorren larunbatean jokatuko dituzte Hernaniko esku pelotariek, Tolosako Beotibar frontoian, urteko partidu garrantzitsuenetako hiru. Euskal Herriko Kluben arteko Txapelketako semifinala izango dute jokoan, 19:00etan hasita, Iruñako Oberena taldearen kontra.
Faborito argirik ez da izango, baina Erreka indartsua kanporatu ondoren, gogotsu joango dira hernaniarrak. Jokatuko duten pelotariak, dagoeneko zehaztu dituzte: Paul Ojuel ariko da lau t’erdian, Ioritz Arrieta buruz buru, eta Iñigo Urkizu eta Iñigo Labaka binaka.
Udaberriko Txapelketan, bi bikote semifinaletara
Baina horren aurretik, partidu garrantzitsuak jokatu zituzten, aurreko asteburuan ere. Emaitza onenak, Udaberriko Txapelketan eman zituzten. Izan ere, jardunaldi baten faltan, semifinaletara sailkatu dira Salaberria eta Zugasti jubenilak eta Uitzi eta Albeniz kadeteak, 22-5 irabazita, bi bikoteek. Torneo berean, ordea, 22-18 galdu zuten Jara eta Etxarri kadeteek, Tolosaren kontra, ondo jokatu arren. Hori horrela, aukerarik gabe geratu dira, semifinaletara sailkatzeko.
Oraindik sailkatu daitezkeenak, baina Euskal Herriko Txapelketan, Ojuel eta Labaka seniorrak dira. Ostiralean zeukaten aurreneko aukera, pasea lortzeko, Urmeneta eta Aranbururen kontra; baina 16-22 galdu zuten. Epleko bikoteak atzera jo zuen Ojuel saihesteko, eta ondo atera zitzaion, Labakak defentsa lan ederra egin arren.