Etxebizitzaren inguruko gaiak lantzeko «erabakitze-gunea» da Etxebizitza Mahaia, eta otsailaren 6an Hernanin okupatutako etxebizitza batetik bi pertsona aterarazi ztuztela-eta, «prentsan eta sare sozialetan argitaratu diren informazio oker batzuk zuzendu» nahi izan ditu.
Era berean, argitu du Etxebizitza Mahaia osatzen dutela udal talde politiko guztiek eta zenbait herri eragilek: Kaleratzeak Stop, Amher, Caritas, Eliza Ebanjelikoa, Urrunegi, Duintasuna, Bilgune Feminista, Koxka eta auzo elkarte batzuk.
«Udalak ez du abisu ofizialik jasotzen»
Batetik, argitu du «Hernaniko Udalak ez duela abisu ofizialik jasotzen okupatutako jabetza pribatu batetik jendea aterarazteko agindua dagoenean».
Horrez gain, azpimarratu du «Udalak ez duela etxebizitza husteetan parte hartzen, Donostialde Okupazio Bulegoaren oharrean hala jartzen bazuen ere». Kasu honetan, Bake Epaitegiak Udaltzaingoari abisua pasa ziola azaldu du, «husten ari ziren etxebizitzan bi pertsonekin batera bizi zen txakurraren ardura hartzeko». Baina azkenean pertsona horiek etxebizitza uztea «onartu» eta txakurra ere eraman zuten.
Laguntzeko prest
Azpimarratu du «etxebizitzarako eskubidea pertsona guztien oinarrizko eskubidea dela berresten» duela, eta ohi bezala, Mahaia urgentziaz bildu zela, «egoera bideratzen saiatzeko». «Zerbitzu sozialek ere irtenbide baten bilaketan parte hartu dute», gehitu du.