Gobernu taldeak legealdi honetan zehar hartu dituen erabakietako asko ulertzea «oso zaila» egiten zaiola adierazi du Orain Hernanik prentsa oharrean, eta horren adibide, «EH Bildu Hernaniren azken inkoherentzia» jarri du: «%100 elektrikoa, gutxiago kutsatzen duena eta isilagoa den makina garbigailu bat eskuratzeari ezezkoa ematea».
Gainera, ezezkoa emateko arrazoiak «ez dira egiazkoak» OHren ustez.
«EH Bilduren gehiengo osoak oposizio taldeetako edozein motako proposamen zanpatzen du»
Orain Hernaniren esanetan, «herri ekologiko bat defendatuz gero, adibideekin baieztatu behar da», eta beraz, bere ustez, Udalak «ezin du berriro ere gasoilaren alde egin».
Era berean, EH Bilduren arrazoien aurka egin du. «Ez ditugu sinesten eta ez dira egiazkoak; zera diote: teknologia ez dago guztiz garatua, ez dute behar den autonomiarik, garestiagoak dira, Hernanik bi makina garbigailu soilik ditu eta arriskutsua izango litzateke elektriko bat erostea. Ingurumena eta Hernanin bizi garen pertsonen ongizatea ez dira termino ekonomikoetan soilik neurtu behar».
«Hernanin bi makina garbigailu egotea herria hain zikin egoteko arrazoietako bat izan daiteke»
Beste udaletxe batzuetan, «batzuk oso gertukoak», egiazta daiteke, OHren ustez, mota honetako makinaria garatua dagoela. Autonomia eta gaitasunari dagokienez ere, «aise dabiltzala» ziurtatzen du.
«Baina badaude gauza batzuk gobernu talde honek entzuten ez dituenak. Hernanin bi makina garbigailu egotea herria hain zikin egoteko arrazoietako bat izan daiteke. Akaso ez al da zentzuzkoa makina garbigailu batean inbertitzea, gure herria garbiago egoteko, gutxiago kontamina dezan eta hobeto bizitzeko?». Gaineratu du Eusko Jaurlaritzaren planaren baitan gailu elektrikoak erosteko diru-laguntzak ere badirela, eta beraz, ez duela ulertzen EH Bilduren ezezkoa. «Orain Hernanik eskuratu beharreko makina garbigailua elektrikoa edo gutxiago kutsatzen zuenetakoa izatea proposatu zuen, baina EH Bilduren gehiengo osoak oposizio taldeetako edozein motako proposamen edo ekarpen zanpatzen du», kexatu da.
Arnasten dugun aireari buruz, José Ramón Becerra eta Jesus Uzkudun
Bestalde, Orain Hernanik eta Hernani Martxan taldeak hitzaldia antolatu dute astearterako, hilak 19, 18:30etan Biterin, aire kalitateari buruz aritzeko. Bertan ariko dira José Ramón Becerra, Elkarrekin Podemos taldean EQUO Berdeak alderdiko legebiltzarkidea, eta Jesus Uzkudun, lan osasunaren alde aritzen den hernaniarra.
Hitzaldia antolatu da, hain zuzen, Hernaniko Udalak gure herrian airearen kalitatearen inguruko ikerketa argitaratu berritan, Orain Hernaniren esanetan, «EH Bilduren gobernu taldeari denbora falta izan baitzaio adierazteko biztanleria lasai egon daitekeela, ikerketa horretan oinarrituz». Eman diren datuak eta gobernu taldearen baieztapenak «bat egiten duten eztabaidatu» nahi du alderdiak.