astigarragan galdu zen ospakizun bat berreskuratuko dute datorren astean. Inauterien bueltan iñude eta artzaien konpartsa egoten da herri askotan eta herrian ere egingo da aurten 2002 eta 2012 urteen artean egin eta gero. Berezia izango da, Astigarragako Inauteri igandea: iñude eta artzaien konpartsa Astigar dantza taldeak antolatuko baitu hurrengo martxoaren 3an.
Ergobiako plazatik abiatuko da desfilea, goizeko 11:30etan, eta herria zeharkatu ondoren, Joseba Barandiaran plazara iritsiko dira ordubetera, eguerdiko 12:30etan. Bertan, plaza dantza saioa eskainiko dute, herritar guztientzat.
Astigar taldeko dantzariek antzeztu eta dantzatuko dute iñude eta artzaien paperean; baina kalejiran parte hartzea, irekia izango da, garaiko jantziekin mozorrotuta, zenbait pertsonaia irudikatuz. Horretarako, gainera, jantziak banatuko ditu Astigarrek, nahi duten guztientzat, bere egoitzan.
Antzerkiari laguntzeko, noski, musikarik ez da faltako: txaranga, danborrada, txistulariak, trikitilariak...
Azkeneko urteotan Goizueta, Oria eta Lantzeko inauteriak Astigarragara ekarri ondoren, Astigarrek berreskuratu nahi izan ditu iñude eta artzaiak, partehartze zabalagoa eskaintzen baitute.