Basque Culinary Centerreko ikasleak dira Jeongsoo Lee hegokorearra (Suri deitzen diote eskolan) Joan Campillo valentziarra, eta Marcos López santurtziarra. Eta hiruek hartuko dute parte, «ilusio haundiz», Bertso Gutiziak ekitaldiko bigarren zatia prestatzen, gutiziena, sukaldari eta zerbitzari lanetan. Datorren ostiralean izango da, BCCn bertan, Kronikak antolatuta, Insalusen laguntzarekin. Arratsaldeko 19:00etan hasiko da bertso saioa, Maialen Lujanbio, Aitor Mendiluze, Unai Agirre eta Onintza Enbeitarekin; eta gutizia bereziz osatutako afariaz gozatuko dute gero.
«Ekitaldi bakoitza erronka bat da guretzat, guztiak direlako ezberdinak. Eta Bertso Gutiziak ekitaldiak, ilusio haundia egiten digu, urteekin BCCko tradizio bilakatu delako. Urtero saiatzen gara hobetzen, jendeak ahalik eta gehien gozatu dezan», azaldu du Lópezek.
Sukaldaritza tradizionala, ukitu moderno batekin
Bertan eskainiko dutenari buruz, aurrerapen bat egin dute hiru ikasleek: «sukaldaritza tradizionala egiten dugu, baina ukitu moderno batekin. Hori izaten da jendeak bilatzen duena. Hori bai, ekitaldi bakoitza ezberdina izan dadin, plater bereziak prestatzen ditugu bakoitzean», dio Campillok. Leek nabarmendu du, euskal ekitaldi bat izango denez, hori izango dela «oinarrizko inspirazio iturria». Hori horrela, «tradizioan eta euskal produktuetan» oinarrituko dira, Lópezek azaldu duenez: «kalitate ezin hobearen eta zapore onenaren adibide dira bertako produktuak».
Jeongsoo Leek dioenez, «bertso saioaren ondoren, afari bat momentu ederra da, konpainiaz eta giroaz gozatzen jarraitzeko». Eta jendea errepikatzeko gogoz atera dadin saiatuko dira: «eskuzabaltasun ekintza bat da sukaldaritza, guretzat. Gure onena ematen dugu, jendeak ahalik eta gehien gozatzeko. Eta lortu dugula ikusten dugunean, gure sentimendua deskribaezina da», dio Lópezek.
Bere hitzak berretsi dituzte beste bi ikasleek: «sukaldari izatea ez da lanbide erraza, baina hala ere, gauza asko erakutsi dizkit. Poz haundienak, lan gehien dagoen momentuen ondoren iristen dira. Platerek bezeroak asebete dituztela ikusi dezakezu, eta horrelako gauzekin konturatu nintzen, sukaldaritza zela nire bizitzako bidea. Jatea zerbait gehiago izatea nahi dut; esperientzia paregabea», dio Leek.
Campillok, bere aldetik, nabarmendu du: «presiopean lan egitearen txispa hori gustatzen zaigu; azkar egitea baina ondo. Eta benetan asebetetzen gaituena da, ikustea komentsalak pozik geratu direla».
«Presiopean lan egitearen txispa hori gustatzen zaigu; azkar egitea, baina ondo. Eta benetan asebetetzen gaituena da, ikustea komentsalak pozik geratu direla»
20 bat laguneko taldea, zerbitzu onena emateko
Bertaratuak gustora ateratzeko, talde haundia ariko da lanean, 20 bat lagunekoa: «gutxienez zortzi sukaldari izango gara, eta 10-12 zerbitzari egongelan, platerak zerbitzen eta edariak eskaintzen», azaldu dute.
«Erronka nagusia da, egongela eta platerak prest izatea, komentsalak iristen diren momenturako. Horretarako, ondo antolatzea funtsezkoa da», nabarmendu du Campillok.
Sukaldariak, bi egun lehenago hasten dira lanean: «pertsona bakoitza plater bat edo bi prestatzeaz arduratzen da, eta aurreko bi egunetan aritzen gara lanean, egunerako dena prest izateko», dio Lópezek.
Dena puntu-puntuan izan behar dute egongelakoek ere, eta ekitaldia hasi aurretik, «tentuz begiratzen dugu, ontziak, mahai-tresnak eta kopak txukun-txukun daudela», azaldu du Jeongsoo Leek. Egongelan aurreneko esperientzia izango du berak, eta honetatik asko ikastea espero du.
«Ikuspegia zabaltzen laguntzen digu BCCk; sukaldeko lana baino askoz ere gehiago da sukaldaritza»
Egongelako lan hori da, Basque Culinary Centerren deskubritu dutenetako bat. «Gastronomiaren inguruko ikuspegia zabaltzen laguntzen digu BCCk. Erakusten digu, pentsatzeko eta egoera jakin bati heltzeko mo-du ezberdinak daudela. Konturatzen gara, sukaldatzea zati bat bakarrik dela, eta ez du zertan zabalena izan», adierazi du Marcos Lópezek.
Hala uste du Jeongsoo Leek ere: «chef baten egiteko nagusia ez da teknika kulinarioak ikastea bakarrik; baita produktu, zerbitzu eta negozio berriak sortu eta garatzea ere. Produkzio kulinariotik harago doaz, baina ezinbestekoak dira, ahalik eta ondoen garatzeko».
Ikasturtearen hasieran, Mugaritz jatetxeko Joserra Calvok eman zien hitzaldi bat dauka gogoan, Joan Campillok: «egongelaren alderdia zabaldu zigun berak, askok buruan ez geneukana. Sukaldeko lana bakarrik ikasten dugula pentsatzen dugu askotan. Horrelako hitzaldi asko izaten ditugu, eta klasean ere sortzen dira gaiak, erakusten digutenak sukaldeko lanak baino askoz ere gehiago dela sukaldaritza, eta asko daukagula deskubritzeko, oraindik».
«Produktu berarekin, bi plater ezberdin bezain goxo prestatuko dituzte, kultura ezberdineko sukaldariek»
Munduko txoko guztietatik etorritako ikasleak daude BCCn; eta guztiak datoz bat, hori oso aberasgarria dela denentzat.
Leek berak azaldu du, «oso bestelako» gastronomia aurkitu duela hemen, Hego Koreakoaren aldean: «uste dut oso aukera ona izan zela hona etortzea, ikastera. Ez dut sukaldaritza bakarrik ikasten; egunero daukat aukera, bertako kultura, hizkuntza eta ohiturak ezagutzeko, eta horrek oso zoriontsu egiten nau», azpimarratu du.
Gertuagotik, Valentziatik etorria da Campillo, eta nabarmendu du, sei herrialdetako ikasleak daudela bere taldean: «horrek asko aberasten du gure kultura gastronomikoa».
Izan ere, osagai berberekin sukaldatzeko aukerak asko zabaltzen ditu, herrialde ezberdinetako kultura eta gastronomiak ezagutzeak: «sekulako aniztasuna dago munduan, eta oso modu ezberdinetara ikusi eta ulertzen dugu produktu bera. Eman patata bat Limako bati, eta gero Bilboko bati; bi plater oso ezberdin prestatuko dituzte, eta biak oso goxoak», nabarmendu du santurtziarrak.
BERTSO GUTIZIAK
Otsailak 22, ostirala, BCCn
Arratsaldeko 19:00etan, bertso saioa: Maialen Lujanbio, Aitor Mendiluze, Unai Agirre eta Onintza Enbeita. Unai Elizasu gai-jartzaile.
Ondoren, gutizia bereziz osatutako luntx-afaria.
Sarrerak: Dobera-Kronikako bazkideek eta Kronikalariek 20 euro;
gainerakoek, 25 euro.
l Hernanin: Kronikaren bulegoan, eta Kixkal eta Aralar tabernetan.
l Astigarragan: Ikatza tabernan.