Atzo zen biltzekoa, Gipuzkoako Garraio Agintaritza, garraio publikoaren 2019 urterako tarifak adosteko, EH Bilduk azaldu duenez. Izan ere, gogorarazi du: «aurreko deialdian ez zen batzarrik egin, gutxieneko quorumik ez zelako egon; PSE-EEko ordezkariak bakarrik bertaratu ziren».
Horren inguruan, agerraldia egin zuten asteartean, Koro Etxeberria Hernaniko Udaleko zinegotziak, Jon Albizu batzarkideak, eta Jon Txasko Errenteriako zinegotziak. Nabarmendu zuten, adostasunetara iristeko «beharra eta obligazioa» daukala PSE-EEk: «logikak dio, EAJrekin iritsi beharko lukeela akordioetara. Baina azkeneko batzarrera EAJren ordezkaririk azaldu ez izanak, agerian utzi ditu tarifak adosteko EAJk eta PSE-EEk dituzten desadostasunak».
Hori horrela, «EH Bildurekin adostea da PSE-EEren bigarren aukera», agerraldian adierazi zutenez. Adostatasunera iristeko deia egin dio EH Bilduk, Marisol Garmendia foru diputatuari; eta bi eskaera egin dizkio: «51garren bidaiatik aurrera doakoa izatea, tarifa finkoaren efektua egingo lukeena, bere garaian Diputazioak hitz eman zuen moduan; eta transbordoak ere doakoak izatea, orain bilete merkeenaren %25a ordaintzen baita. Honek onura ekarriko lieke, garraio publikoa gehien erabiltzen dutenei».
«Erantzunik jaso gabe jarraitzen dugu»
Era berean, Albizuk azaldu zuen, akordiotara iristeko deia egin ziela Marisol Garmendiak, Garraio Agintaritzako kide guztiei; baina «propaganda hutsa» izan zela: «ez da agintaritzako kideekin harremanetan jarri, ez behintzat EH Bilduko ordezkariekin». Eta azaldu dute, joan den astean helarazi ziotela gutuna, Hernani eta Errenteriako Udalek, akordiotara iristeko borondatea adieraziz: «baina erantzunik jaso gabe jarraitzen dugu. Uste dugu benetan kezkagarria dela, gauzatzeko konkreziorik ez duten deialdi publikoak egitea».
EH Bilduk adierazi du, PSE-EEren proposamenean, «pauso bat» dela «orain arteko abantailei gazteentzako hobariak gehitzea»; baina ez dela esperotakoa, «duela lau urte tarifa finkoa agindu zuen Aldundiarengatik», diote.