«Gazteria funtsezko ardatz bat da», adierazi zuen Urkiri Salaberriak, Astigarragan egin den Gazteria Plan berriaren Diagnosiaren aurkezpenean. Astigarragan egin zen azkena 1990 urtekoa da eta gaur egungo gazteen errealitatera hurbildu eta hobeto ezagutzeko, gero planak abian jartzeko, beharrezkoa ikusi du Udalak.
Honela, Aztiker Ikerketa soziologikoan espezializatutako kooperatibarekin kontaktuan jarri eta diagnosia egiteko eskatu zaio Mikel Arostegi gazteri teknikaria eta Gaztelokaleko langileen elkarlanarekin. Ostegunean aurkeztu zuten lana.
Aztikerreko Xabier Lukek eman zituen datuak. «Hiru adin tartean banatu ditugu (12-17, 18-25 eta 26-35 urte) galdeketak eta maila kuantitatiboan (datuak lortuz) eta kualitatiboan (elkarrizketak eginez)».
Emaitzek datu esanguratsu batzuk utzi dituzte. Kuantitatiboki kontuan hartu behar omen da Astigarraga, Euskadirekin alderatuz, askoz ere herri gazteagoa dela. Piramidea asko zabalagoa da gazteen adin tartean. Biztanleria ere bikoiztu egin da azken bi hamarkadetan. «Horrek esan nahi du hurrengo bi hamarkadetan gazteek protagonismo haundia edukiko dutela herrian eta herria oraindik ere gehiago haziko da», adierazi zuen Lukek.
Antzekotasunak EAErekin
Kualitatiboki ordea Astigarraga eta Euskal Autonomi Erkidegoaren artean antzekotasunak askoz ere haundiagoak dira. «Euskerari dagokionez gazteenak dira gehien erabiltzen dutenak, baina gazteek, batez ere 18 urtetik gorakoek, gehiago ezagutu arren gutxiago erabiltzen dute». Etxebizitza eta lana dira gehien arduratzen dien bi gai nagusiak. «Gainera jakitun dira lana egin nahi duten arlo horretan prekarietatea gero eta haundiagoa dela eta horrek emantzipazioa nahi baino beranduago egingo dutela».
Aisialdiari dagokionez, bi adin tarte helduenetan Astigarragan gune falta nabaritzen dute eta Donostia aipatzen da hori aurkitzen duten leku bezala. «Musika entzutea eta zinea aipatzen dituzte. Kirol jarduera ohikoagoa da mutilen artean».
Arduratzen duen beste gaia kohesio falta da. «Hazkunde demografikoari lotua dago kohesio falta. Bizikidetza ez dago arriskuan, baina ez dago duela urte batzuk zegoen kohesio hori gazte eta helduen artean Astigarragan». Datu hauek eta gehiago kontuan hartuta Udalak Gazteri Plana du abian etorkizunean. Autonomia eta emantzipazioa bultzatu, bizi kalitatea hobetu, Udala eta gazteak hurbildu eta nortasun kolektiboa erdigunean jartzea proposatu zuen Lukek.