Bihar egingo du Astigarragako Mundarrok, otsaileko mendi irteera. Adarra mendira igoko dira elkarrekin, Besabitik abiatuta, ibilbide zirkularra osatuz.
Abiapuntura joateko, goizeko 09:30etan jarri dute zita, Joseba Barandiaran plazan; eta kotxe partikularretan mugituko dira Besabira. Irteeran parte hartzeko, hori bai, izena eman behar da aurrez: kiroldegira azalduta, edo emailez, kiroldegia@astigarraga.eus helbidera idatzita.
Somportera eskiatzera, martxoaren 9an eta 10ean
Martxoan, berriz, iraupen eskia egingo dute, familian edo lagun artean. Somporteko eski zentrora joango dira, martxoaren 9an eta 10ean.
Bertara joan nahi dutenek, otsailaren 28ra arte daukate epea, izena emateko, kiroldegian edo emailez. Helduen forfaita 9,5 euro dira, eta haurrena 6 euro. Material alokairua, berriz, 11 euro dira helduentzat, eta 8 euro haurrentzat. Prezio bereziak izango dira, familientzat; eta aterpetxea hartzeko ere, badago aukera.
Martxoaren 1ean, bilera bat egingo dute, irteeraren xehetasun guztiak argitzeko. Kiroldegian izango da, arratsaldeko 16:00etan hasita.