Datorren legegintzaldiari begira, Herri Programa osatzen ari da EH Bildu, herritarren laguntzarekin. Gaur, orain arte jaso diren proposamenak aztertu eta haien inguruan eztabaidatzeko beste batzar ireki bat deitu da, 10:00etatik 13:00etara, Andrekale 24 zenbakiko Bilgunean.
Ekarpenak egiteko aukera, oraindik ere
Abenduan hasi zuen EH Bilduk 2019-2023 legegintzaldirako Herri Programa osatzeko prozesu irekia.
Aurrena, orain arte egindako lanaren balorazioa eta egungo legegintzaldiaren diagnostikoa egin ziren, eta horretan oinarrituta, proposamenak egiteko epea ireki zen. Denera, 20 bat lan-taldetan banatuta, 20 bat gairen inguruko lanketa egin dela azpimarratu du alderdiak, eta hain zuzen, herritar horiek egindako ekarpenak izango dira gaurko batzarrean aurkeztuko direnak.
Hilabete bukaera edo martxoa hasierarako bukatu nahi du Herri Programa, EH Bilduk.
Helburua izango da egin diren proposamen horiek aztertu, horien inguruan eztabaidatu eta ekarpenak egitea, eta guztiarekin Herri Programa osatzeko proposamenak finkatzea.
Azpimarratu dute oraindik ere badela ekarpenak egiteko aukera, baina prozesua otsaila bukaerarako edo martxoa hasierarako bukatu nahi dute.