Ligaxkako azkeneko jardunaldia jokatuko dute gaur, esku pelotari hernaniarrek, Gipuzkoako Trinkete Txapelketan, binaka. Eta hiru bikotek daukate zita garrantzitsua, bereziki: irabaziz gero, azken fasera sailkatuko dira; baina galduz gero, kanpoan geratuko dira.
Egoera horretan daude Oiartzabal eta Lasa jubenilak. Izurun taldearen kontra jokatuko dute Donostiako Gaskan, arratsaldeko 16:30etan hasita. Semifinaletara pasako dira, irabazita.
Eta Gaskan jokatuko dute, beste bi bikoteek ere; kadete mailakoak biak. Aurrena, 15:00etan hasita, Garaiarrek eta Arluziagak jokatuko dute, Gaztelekuren kontra. Eta ondoren, 15:30etan, Insausti II eta Jara ariko dira, Mundarroko bikotearen kontra.
Hernaniko kiroldegiko frontoian, berriz, gaur eta bihar ez da esku pelota partidurik izango.