Hilero bigarren larunbatarekin egiten den bezala, Bigarren Eskuko Azoka jarriko da gaur 10:30etatik 13:30etara bitartean. Eguraldi ona egiten badu, Urbieta kalean zehar jarriko dira postuak, eta bestela, Atsegindegin.
Gaurko azoka, ordea, berezia izango da. Izan ere, ohiko postuez gain, Inauterietako mozorroak edota osagarriak saldu eta erosteko postuak ere jarriko dira. Postu horietan zerbait saldu nahi duenak ez du aldez aurretik postua jartzeko baimenik eskatu behar. Nahikoa izango da gaur goizean saldu nahi dena gordailuan uztea.
Gordailu sistema, Inauterietako produktuak saldu eta erosteko
Beste batzuetan egin den bezala, Inauterietako mozorroak edota osagarriak saldu nahi dituenak gordailuan utzi ahal izango ditu, goizeko 09:00etatik 10:30etarako tartean; azoka hasi bitartean.
Saldu nahi diren produktuak uzteko momentuan, NANa erakutsi beharko da, eta saltzeko ezarri nahi den prezioa zein den adierazi. Azoka bukatzen denean, gordailuan zerbait utzi duenak bertatik pasa beharko du berriro ere, saldu ez dena jaso, edo saldutakoaren trukean irabazitako dirua hartzeko.