Koordinadora Feminista lanean hasia da, Martxoaren 8ko greba eguna prestatzeko. Lehengo ostegunean egin zuten aurreneko bilera irekia, deialdiaren inguruan informazioa eman, hausnartu eta greba nola egin elkarrekin pentsatu eta adosteko. Bigarren bilera eguna ere zehaztu dute: otsailaren 14an egingo da, 18:30etan Biterin.
Bost ardatzeko greba aurten, pentsiodunak gehituta
Aurreneko bilera horretan aurtengo greba deialdiaren inguruko informazioa eman zen, hasteko. Iaz bezala, lau aldarrikapen egin nahi dira aurten ere Emakumeen* Egunean: bizitza erdigunean jartzekoa, indarkeria matxistaren aurka egitekoa, arrazakeria eta xenofobiaren aurka egitekoa, eta prekarietatearen aurka egitekoa.
Baina berrikuntzak ere iragarri dira. Batetik, greba 24 ordukoa egitea proposatu da, eta bestetik, iaz greba egindako lau ardatzei bosgarrena gehitu zaie: pentsiodunena. Horrela, greba egiteko deialdia egin da enpleguan, ikasketetan, zaintza-lanetan, kontsumoan eta pentsiodunen artean.
Lan-taldeak osatzen
Aurreneko bilera horretan, greba deialdiaren nondik-norakoak emateaz gain, bestelako ariketa bat ere egin zen, norberak greba deialdi honekin eta aldarrikapen horiekin bat egiteko dauzkan arrazoiak aztertu eta ulertzeko.
Era berean, Martxoaren 8aren aurretik eta egunean bertan egin behar diren lanak zein diren aztertu eta horiek betetzeko nola antolatu adosten hasi ziren. Hain zuzen, lan-talde batzuk sortzen hasi ziren, eta datorren osteguneko bilera irekian talde horiek osatu eta martxan jartzen saiatuko dira.
Greba bai, baina nola?
Hernaniko Koordinadora Feminista Martxoak 8ko deialdiaren bueltako ekintzak Hernanin nola antolatu prestatzen hasi den bezala, Euskal Herri osoan ere hasi dira mugitzen hainbat eragile. Horrela, pasa berri den asteazkenean erregistratu zuten Martxoaren 8ko greba feminista, LAB, ESK, STEILAS, EHNE, HIRU, CNT eta CGT sindikatuek.
Era berean, deialdiren inguruko informazioa bildu eta antolaketa lanetan laguntzeko materiala denen eskura jartzeko grebafeminista.wordpress.com webgunea sortu da. Bertan, «Euskal Herriko emakume, trans eta bollerok mundua gelditzeko» deialdia egiten da, eta «enplegu greba» egiteaz gain, «kontsumo, ikasle, pentsionista eta zaintzen greba ere» egiteko deialdia zabaldu dute: «Gure lanek ez badute balio, gu gabe produzitu dezatela!».
Zentzu horretan, 24 orduko greba deialdiarekin bat egin ezin dutenak ere kontuan izan dira, eta lehengo urtean bezala, aldarrikapenekin bat egiteko modu desberdinak ere proposatuko dira: zinta morea besoan lotuta eramatea, edo lantokia dekoratzea, adibidez.
Deialdiarekin bat egin nahi duten gizonezkoei bideratuta ere, hainbat proposamen egiten dira. Adibidez, «soldatapeko lana» dutenen kasuan, «norberaren eginkizunetarako egunak erabiliz» lanik ez egitea, edo «negozio propioa» dutenen kasuan, «ateak ixtea». Era berean, «lehentasuna zaintza lanez arduratzea» dela gogorarazi da, eta «mobilizazioetan parte hartuz gero, emakumeon* protagonismo eta bisibilizazioa ezinbestekoak direla».
Ostegunean gaia lantzen segi ahal izango da, bileran.