Golik gabe, baina urteko aurreneko puntua eskuratuta bukatu zuen partidua asteburuan Astigarragako Mundarroko mutilen taldeak. 0-0 berdindu zuten moreek, Urnietaren kontra, kanpoan.
Izotzak baldintzatuta, hasieratik
Zelaiaren egoerak, eta bereziki izotzak, baldintzatu zuen partidua, hasieratik. Baina horrek ez zituen bi taldeen gogoak zapuztu; hasieratik bilatu zuten garaipena, nahiz eta bitako inork ez zuen ukitu.
Aurreneko zatian, Mundarroko mutilek egoera hobeak sortu zituzten haien alde, baina ez zuten gola sartzea lortu. Horrez gain, aurkarien baloia geldiarazi beharrean ere izan zen Astigarragako atezaina; hura izan zen aurreneko zatiko geldiketa onena.
Ildo beretik joan zen bigarren zatia ere. Astigartarrak gehiago iritsi ziren kontrarioen zelaira, baina atezainari lan gehiegirik eman gabe, erremateetan ez baitzuten asmatzerik izan. Urnietakoek, aldiz, Astigarragako atezaina bitan ateratzea derrigortu zuten.
Bitako inork ez zuen, ordea, markagailurik estreinatu, eta berdinketarekin konformatu behar izan zuten.