Apirilaren 4tik 14ra bitarte izango da aurten Korrika, AEK euskaltegiak urtarrilaren hasieran iragarri zuen bezala. Bukaera aldera, apirilaren 13an pasako da Hernani eta Astigarragatik.
Apirilera begira dago dagoeneko Hernanialdeko AEK, hau da, Hernani, Astigarraga eta Urnieta batzen dituena, eta herritarrak proiektura hurbiltzeko, aurkezpen-festa egingo dute bihar.
Arratsaldeko 19:00etan emango diote hasiera ekitalditxoari, prentsaurrekoarekin. Hernaniko AEKn izango da. Bertan emango dute 21. Korrikaren nondik norakoen berri.
Bertso-poteoa, ondoren
Aurkezpenaren ondoren, kalera aterako dira Hernanialdeko AEK-ko kideak, herritarrek ere aurtengo Korrikarekin Klika egin dezaten. Bertso-poteoa egingo dute horretarako, arratsaldeko 19:30etan Hernaniko AEKtik abiatuta. Eta gonbidatu bereziak bertaratuko dira, herria beren bertsoekin girotzera: Eli Pagola, Oier Iurramendi, eta Asier Azpiroz.
Prentsaurrekoaren ondoren, bertso-poteoa egingo da, Hernaniko tabernetan
zehar.
Haiekin batera, Atxur tabernara, Ondira, Garinera eta Goiz Argira joango dira.
Arropa eskuragarri, euskaltegian
Horrekin batera, gogorarazi dute, Korrikaren laguntzaile egiteko aukera dagoela, 12 euroan, baita arropa eskuratzekoa ere. Hiru euskaltegietan izango da aukera: Hernanin, Astigarragan, eta Urnietan.