Espazio berritzailea jarriko du martxan gaur Astigarragako Udaleko Berdintasun sailak. Astigunea: ahalduntzeko zaintza-elkargunea inauguratuko dute, «emakumearen ahalduntzea errazteko espazioa».
Gaur hasi eta ekainera arte luzatuko da egitasmoa. Asteartero elkartuko da taldetxoa, arratsaldeko 16:00etatik 18:00etara bitarte, kultur etxean.
«Taldeak markatuko ditu beharrak, eta erritmoa»
Espazioaren asmoa da «norberaren burua eta besteak zaintzeko elkargunea» izatea. Emakumeak elkartzeko eta espresatzeko tokia izango da, eta lanketa desberdinak egingo dituzte, gehienetan, dinamizatzaile baten laguntzaz: «gorputza zein ahotsa indartu eta trebatzeko bideak landuko dira mugimendu, komunikazio ez bortitza, erlaxazio eta sormenaren bidez».
Dena den, Berdintasun sailetik onartu dutenez, «taldeak markatuko ditu beharrak, eta erritmoa».
Izenematea, Berdintasun Sailean
Taldea irekia izango dela adierazi dute, baina jarrikotasuna ere eskatuko dute. Izena ematea gomendatu dute; Berdintasun sailean egingo da hori: berdintasuna@astigarraga.eus edo 943 50 57 01. Zaintza zerbitzua ere izango da.