Hernaniko EH Bildu ari da 2019-2023 legealdirako Herri Programa prestatzen. Abenduan aurreko legealdiko programa eta burututako lanaren diagnostikoa egin eta gero, hurrengo lau urteetarako proposamenen fasean murgildu dira EH Bilduko kideak, beraz, deia luzatzen die herritarrei prozesuan parte hartu eta proposamenak egin ditzaten. «Orain daukagu aukera, proposamenak egin, eztabaidatu, hurrengo lau urtetan garatuko diren lan ildoak erabaki eta onartzeko».
Larunbatean, otsailaren 9an, goizeko 10:00etatik 13:00etara Andre kale 24ko bilgunean egingo den Herri Batzarrean izango da horretarako aukera.
20 gai ezberdinen inguruan ari dira lanean beste horrenbeste talde. Oraingoz, azken urteotan egindako lanaren diagnostikoa jaso dute, eta horretan oinarrituta finkatuko dute Herri Programa.
Datorren larunbateko batzarrean aztertuko dira dauden proposamenak, egindako ekarpenak mahai gainean jarri, eztabaidatu eta ondorio horietatik aterako da ondorengo lau urteetarako EH Bilduren Herri Programa.
Esan bezala 20 taldetan banatuta oraingoz ehun lagun inguruk parte hartu du EH Bilduk otsaila amaierarako edota martxoaren hasierarako burutu nahi duen prozesuan. Herri Programa adosteaz gain herritar horiek izango dira 2019-2023 legegintzaldian, EH Bilduren zinegotzien bide lagun, Udaleko ordezkarien laguntzaile.
Oraindik nahi duten herritarrek dute parte hartu eta ekarpenak egiteko aukera. Prozesua irekia izaten ari da eta izango da ondorengo asteetan ere.