Kronikak Insalusen laguntzarekin antolatutako Bertso Gutiziak ekimenerako sarrerak bihar jarriko dira salgai. Doberako bazkideek eta Kronikalariek prezio berezia iznago dute, 20 euro. Gainontzekoentzat 25 euroan salduko dira. Sarrerak lortu daitezke Kronikan bertan, Larramendi 11; Hernaniko Kixkal eta Aralar tabernetan; Astigarragako Ikatzan; Ereñotzuko Irrintzi Tabernan; eta Goizuetako Amaia Kafetegian.
Aurten Bertso Gutiziak otsailera bueltatu dira pasa den urtean apirilean egin eta gero. Otsailaren 22a da aukeratutako eguna eta beraz, ez ahaztu, eta apuntatu zure agendan! Basque Culinary Centerren egingo da.
Onintza Enbeita, Unai Agirre, Maialen Lujanbio eta Aitor Mendiluze, BCCn
Azkeneko hiru urteetakoaren antzekoa izango da aurtengo Bertso Gutiziak. Arratsaldeko 19:00etan emango zaio hasiera saioari Basque Culinary Centerreko areto nagusian, eta hori pasata, ordu eta erdi beranduago gutxi gorabehera, hasiko da afaria. Mokadutxoek osatutako otordua izango da, BCCko ikasleek beraiek prestatutakoa.
Punta-puntako lau bertsolarik hartuko dute parte, horietako hiru errepikatzaileak: Maialen Lujanbio, Unai Agirre, Aitor Mendiluze eta Onintza Enbeita.
Lujanbiok eta Agirrek azkeneko hiru edizioetan jarri zioten puntua saioari; duela hiru urtekoan eta pasa den urtean izan zen Mendiluze, eta Basque Culinary Centerreko oholtzaren gainean estreinatuko da, aurten, Onintza Enbeita Bizkaiko txapeldun berria. Laurak ere aski ezagunak.