Koopfabrika abian da eredu berriarekin eta bihar hasiko da formazio trinkoen fasea. Hori baino aurretik, aurkezpen ekitaldi bat egingo dute hasiera emateko.
Hernaniko Iturola Elkarlan Sorgunean (Florida auzoa, 28) ekingo zaio aurkezpen ekitaldiari, bihar. Lehendabizi KoopFabrikaren aurkezpen ekitaldia egingo da, 09:00etatik 09:30etara.
Ondoren, 09:30etatik 14:00etara KoopFabrikan izena eman eta formazioak modu trinkoan jasotzea erabaki duten pertsonei zuzendutako lehenengo formazio saioa emango da: Enpresa eredua: ekonomia soziala eta kooperatibagintza izenburupean.
Arianne Kareagaren (Lanki Ikertegia-Mondragon Unibertsitatea) eta Beñat Irasuegiren (Talaios Kooperatiba eta Olatukoop) eskutik emango da lehendabiziko formazioa bihar Iturolan.
Partehartzaileak, finantzatzaileak eta antolatzaileak egongo dira aurkezpen ekitaldian
Biharko ekitaldian partehartzaileen artean egongo dira antolatzaileak diren: Olatukoopeko Mikel Valero; Mondragon unibertsitateko HUHEZI fakultateko Aitzol Loyola; eta EHUko Gezki institutuko Enekoitz Etxezarreta.
Arianne Kareaga eta Beñat Irasegi adituen eskutik emango da bihar lehendabiziko formazioa 09:30etan hasita.
Proiektuaren finantzatzailea den Gipuzkoako Foru Aldundiko ordezkari bat ere egongo da bertan eta Tokiko eragilea den Beterri-Buruntza udaletako lehendakaria Jon Zulueta ere bertan egongo da.
Ekonomia sozial berria sustatzeko programa da
KoopFabrika ekonomia sozial berria eta ekintzailetasun soziala sustatzeko programa da, 2017tik abian dagoena.
Lankidetzan sorturiko programa da KoopFabrika, izaera anitzeko eragileak saretzen dituena: Mondragon Unibertsitateko Lanki ikertegia, OlatuKoop sarea, EHUko GEZKI Gizarte Ekonomia Zuzenbide Kooperatiboaren Institutua eta Beterri-Buruntzako udalak, Gipuzkoako Foru Aldundiak finantzatuta.
KoopFabrikan parte hartu duten proiektuak asko eta askotarikoak dira, 50etik gora orain arte hasi zenetik 2017an: ekintzaile indibidualak, dimentsio kolektiboa duten proiektuak, Euskal Herri osoan oso hedatua dagoen elkartegintza profesionalizatu nahi dutenak, abian egonda ere kontsolidatu nahi duten proiektuak...