Dagoeneko pasa dira aste batzuk txotx denboraldiari ongietorria eman genionetik, eta horrekin batera, urteroko ekintzak ere badatoz. Beste modu batera ‘txotx’ egiteko aukera eskainiko du, hamalaugarrenez, Sagar Lasterrak, CD Hernani atletismo sailaren eskutik.
Otsailaren 23an izango da aurten 8.9 kilometroko lasterketa; Hernaniko Arraun Elkartearen egoitzaren paretik hasiko da goizeko 11:00etan, eta Ave Maria parkean izango du helmuga, azken urteetan bezalaxe.
Izena eman nahi dutenek, aukera daukate jada. Horretarako, bi bide jarri dituzte: www.kirolprobak.com edo www.rockthesport.com. Hilaren 22ra arte 10 euro izango dira. Lasterketa egunean ere, izango da apuntatzeko aukera, 16 euroan.
Izenematearen barruan, doako autobus zerbitzua eskainiko dute kiroldegitik, irteera gunera, hau da, Arraun Elkartearen egoitzaraino.
Berotzeko aukera, bihar
Horretarako, ordea, oraindik aste batzuk geratzen dira. Baina hernaniar eta ingurukoek izango dute berotzeko aukera; bihar izango dute horietako bat, Urnietan. On Bosko krosaren bosgarren edizioa izango da herrian zehar, goizeko 11:00etan abiatuko dira korrikalariak, Salestar ikastetxetik, eta han izango dute helmuga. Bigarrenez, gainera, Indoor Walking lasterketa ere izango da. 7 kilometroko ibilbidea osatu beharko da, bi kasutan.
Gaur arte eman ahal izango da izena www.herrikrosa.eus-en; bihar ere, apuntatu ahal izango da, eskolan bertan.