Beterri-Buruntzaldeako Udalen arteko hitzarmenari esker, bi etxebizitza bideratuko dira gizarte inklusiora, Buruntzaldean. Horietako etxe bat Hernanin egongo da, eta harrera pisua izango da. Bestea, Lasarte-Orian egongo da, eta emanzipaziorako izango da.
Pisu horietako erabiltzaile izateko, Astigarraga, Hernani, Lasarte-Oria, Urnieta, Andoain eta Usurbilgo herritarra izan beharko da, eta 18 urtetik gora izan. Gehienez, sei hilabetez egon ahal izango dira etxe bakoitzean, egonaldi labur edo ertainerako prestatutakoak baitira, eta haien egonaldia gainbegiratu egingo da, gizarteratze prozesuan laguntzeko. Izan ere, bazterketa-arriskuan dauden pertsonei bideratutako tutoretzapeko etxebizitza zerbitzuaren barruan eskainiko diren bi etxebizitza izango dira horiek, eta helburua izango da baliabide ekonomiko pertsonalik ez dutenak eta gizartearen edo familiaren babesik ere ez dutenak laguntzea.
Gipuzkoako Gizarte Zerbitzuen Mapari segika
Sei herrietako Udalen arteko hitzarmen hau lotuta dago Gipuzkoako Gizarte Zerbitzuen Mapak 2018-2021 eperako onartutakoarekin.
Bertan jasotzen dira, besteak beste, lurraldeko zerbitzuen egoeraren diagnosia egiteko konpromisoa, gaur egungo zerbitzu eta eskaeren azterketa egitea, sare publikoaren gabeziak zein diren ezagutzea, eta kobertura beharrak eta lehentasuneko interbentzioak zein izan behar diren zehaztea. Ildo horretatik, lehentasuneko interbentziotzat jo da gizarte inklusioa, eta horri lotuta, hain zuzen, bazterkeria arriskuan egon litezkeen herritarrentzat etxebizitza zerbitzua eta enplegurako bideak sustatzea.