Urumea bailarako palista eta pelotariek gaur jokatuko dituzten hainbat partidurekin emango diote hasiera asteburuari. Partidu esanguratsuenen artean, bi izango dira nabarmenenak.
Batetik, Emakumea Pilotari Txapelketan, finalerdia jokatuko dute eskuz binaka Araiztegi eta Arrietak, 18:30etan Azpeitian, aurreneko mailan. Nora eta Maider Mendizabal izango dituzte aurkari.
Bestetik, Euskal Herriko Txapelketako gune bilakatuko da Hernani gaur, 20:30etatik aurrera, elite mailako seniorretako partiduak jokatuko baitira. Aurrena, Epleko Urmeneta eta Aranburu ariko dira Oberenako Tainta eta Cordonen kontra, eta ondoren, Paul Ojuel eta Iñigo Labaka hernaniarrak ariko dira Lemoako Garcia eta Etxeberriaren aurka.
Astigarragan eta Goizuetan ere bai
Bestalde, pelotari goizuetar eta astigartarrek ere gaur hasiko dute asteburua.
Astigarragako Txomiñenea frontoian eskuz binaka ariko dira hirugarren mailako kadeteak, Arrasateren kontra, 19:30etan. Bigarren mailako infantilek, berriz, Oiartzunen jokatuko dute gaur 19:15etan.
Umore Onako goizuetarrek ere izango dituzte partiduak gaur: 18:30etan hasita, etxean ariko dira eskuz binaka benjaminak, Errekaren kontra aurrena, eta Ultzamaren kontra gero, eta infantilak, Txarutaren aurka, bukatzeko. Etxetik kanpo, berriz, Legasan jokatuko dute 18:30etan alebin eta benjaminek, Errekaren aurka.
Bestalde, gomazko paletan, jubenil hernaniarrek Alegin jokatuko dute 18:30etan, Intxurreren kontra.
Pala eta pelota eskoletan, aukera
Hernaniko pelota eskolak gogorarazi du gaurkoa dutela izena emateko azken eguna, 2007 eta 2010 urteen artean jaiotakoek. Frontoira jo behar da izena emateko, 17:30etatik 19:00etara.
Pala eskolan, berriz, otsailaren 5ean hasiko dituzte klaseak. Izenematea: hernanikopalistak@gmail.com.