Azkarra eta lasaia izan zen astearteko Plenoa. Abenduaren 18ko aktak onartu ziren lehendabizi. 2018ko abenduan eta 2019ko urtarrilean emandako dekretuen berri eman zen gero, eta baita 2018ko aurrekontuaren kreditu aldaketako espedienteen berri ere. Gai zerrendako laugarren puntuan, kontu-hartzailearen ingera oharrak eta komunikazioa, aurrekontu egonkortasunaren eta finantza iraunkortasunaren helburuak betetzeari buruz ere informatu zuten.
Ondoren etorri zen eztabaida gehien sortu zuen puntua. 2019ko plantila organikoa, lanpostuen zerrenda, organigrama eta funtzioen katalogoaren aldaketak onartzea. Oposizio guztiak erabaki honen aurka bozkatu zuen, zazpi botorekin, eta Udal Gobernuak alde bederatzirekin; eta beraz, onartu zen. Luis Intxauspe alkateak eman zituen lehendabizi azalpenak: Ondare eta kontratazio saileko lege aholkulari bezala langile bat kontratatu da, lege aholkulari postua ordezkatuz. Ondoren, Andoni Amonarraiz EAJko bozeramaileak, aurkako botoaren arrazoia azaldu zuen: «txostena berandu iritsi da». Ildo berean hitz egin zuten PSE-EEko Ricardo Crespok eta Orain Hernaniko Jaione Aristregik.
Amaitzeko, aho batez onartu zen Udalaren eta Donostiako musika eta dantza eskolaren arteko kudeaketa gomendioaren hitzarmena sinatzea. Hitzarmen honekin, lan poltsa bakarra egongo da lurraldean, eta «tramitazio guztiak erraztuko ditu; kontratazioak egiteko, esaterako». Joxan Goikoetxeak sinatuko du gaur hitzarmena.