Zinea Euskaraz! egitasmoaren barruan, berezia izango da urtarrileko saioa, eta puri-purian dagoen pelikula bat ekarriko du Dobera Euskara Elkarteak: Pumori, mendiaren alaba emango da gaur, arratsaldeko 18:30etan hasita, Sandiusterrin. Unai Ugartemendia kazetariak aurkeztuko du.
Filmak gogora ekarri nahi ditu, Suku Maya gazte nepaldarraren istorioaren bitartez, 2001eko urrian, Himalayako Pumori mendiaren magalean elur-jausi batek harrapatuta hil ziren bost mendizale euskaldunak.
Beñat Arrue aizarnarra zen haietako bat, eta bere kamararekin atera zuen azkeneko argazkian, Sukurekin ageri da, 3 urte zituela. Istripua gertatu eta urtebetera, Nepalera egin zuten bidaia Beñaten gurasoek, istripuaren tokira hurbiltzeko, batetik; eta argazkian ageri zen neska hura ezagutzeko, bestetik. Haiekin bizi da orain, Aizarnan.
Dokumentala ikusteko, sarrerak salgai daude, 5 euroan, Dobera Euskara Elkartearen bulegoan (Larramendi kalea 11, behea); eta emanaldiaren aurretik, Sandiusterrin bertan ere izango da aukera, erosteko.
Bildutako diru guztia, SOS Himalaya Fundazioarentzako izango da.