Pronostikoak bete ziren, bai; baina bere onena eman behar izan zuen Javier Urrizak, atzo, Buruz Buruko Master Torneoko txapela janzteko. Bosgarrena du iruñarrak, final gogor bezain eder baten ondoren lortutakoa. Partidu haundia jokatu zuen Xanti Utergak, eta bukaeran bakarrik egin zion ihes Urrizak (30-25).
Are gehiago, doneztebarrak hartu zuen aurrea markagailuan, partiduaren hasieran; eta 4-9 eta 7-11 izan zen aurretik. Berak egin zituen tantorik ederrenak, bereziki bi paretaz; zazpi lortu zituen horrela.
Utergak egin zituen aurreneko tarteak, eta 4-9 eta 7-11 izan zen aurretik markagailuan.
Urrizak, ordea, bere betiko segurtasuna izan zuen arma nagusia. Txoko guztietara iritsi zen, eta sendo aritu zen, partidu osoan. Horrela lortu zuen berdintzea, baita tarte txikiak egitea ere, 22-22 berdindu zuten arte. Hortik, zuzenean egin zuen ihes 27-22ra, eta 29-23ra. Bi pareta ederrekin, lau tantora gerturatu zen Uterga, baina hor bukatu ziren bere esperantzak. Faboritoak jantzi zuen txapela, majo sufrituta.
Azkenean, 26 tanto eginda bukatu zuen Urrizak, horietako hiru sakez; eta 22rekin Utergak, saketik lau eginda. Akats gutxiko partidua, beraz.