Aurrerapauso bat emateko gogoz egin zuen bidaia Hernanik, Burgosera; baina haizeak eraman zituen itxaropen guztiak, atzokoan. Burgos gehiago izan zen San Amaron, eta trikoloreek ia atsedenera arte eutsi zuten arren, alde nabarmenarekin nagusitu ziren etxekoak, erasoko bonus eta guzti (46-18). Esku hutsik bueltatu zen Hernani, eta beheko postuei begira.
Izan ere, Cisnerosek garaipena lortu zuen Santboianaren kontra, eta aurrea hartu die hernaniarrei. Orain, hiru puntu atzetik dago La Vila, jaitsierako play off postuan. Gernika azkenak, behintzat, porrotak pilatzen jarraitzen du, eta 11 puntura dago.
Hasieratik izan zen nagusi Burgos, eta berehala aurreratu zen, entsaio batekin. Orduan aritu zen ondoen Hernani, baina ezin entsaioak gauzatu, bi zigor kolperekin konformatu behar izan zuen (10-6). Atsedenaren aurretik, ordea, aztoratu egin zen partidua, eta bost minututan, bi entsaio egin zituen Burgosek, eta beste bat Hernanik (22-13). Bigarren zatian, nahi eta ezin aritu ziren trikoloreak: zazpi entsaio egitera iritsi zen Burgos (46-18).