Ekain eta Eñaut Lizeaga Otaño anaiek pasa den asteburuan Gipuzkoako Trinketeko finala jokatu zuten elkarren aurka Irurako trinketean. Ekainek, anai zaharragoak, 30-18 irabazi zion Eñaut anai gazteari. Biak ere kadeteak; Ekain 2003ko urrian jaioa da eta Eñaut hilabete berean jaio zen urte bete beranduago, 2004an.
Sorpresarik ez Eñauten ustez. «Espero nuen», hala ere Ekain ez da iritzi berekoa. Hori bai, partidua hasi aurretik ez zuten zin egin behar izan bere garaian Jesus eta Anjel Garcia Ariño anaiek egin behar izan zuten bezala buruz buruko finalerdian. Beste garai batzuk dira. «Horrelakorik ez. Bakoitzak duen guztia eman zuen eta irabaztera irten ginen. Anaiak bai, oso ongi eramaten gara, baina elkarri irabazi nahi diogu» diote bai batek, zein besteak.
1.92 metroko garaiera dute 15 eta 14 urterekin Lizeaga eta Petritegi sagardotegiko semeek
Izugarrizko planta dute biek ere. 1.92 metroko garaiera eta oraindik 15 eta 14 urte dituzte. Abizenek salatzen dituzte; Lizeaga Otaño. «Aita Lizeaga sagardotegikoa da eta ama Petritegikoa». Hala ere, nahiz eta txotx garaian sartuak egon ez ditugu barrika artean ikusiko beraien pasioa eta zaletasuna pelota baita. «Frontoian igarotzen ditugu ordu gehien. Asteburuetan partiduak jokatzen ditugu eta astelehenetik asteazkenera entrenatzen dugu. Ostegunean eskuak errekuperatu eta ostirala eta igande artean jokatzen dira partiduak».
Atzelari eta aurrelari jotzaileak, nahiz eta jokaldiak gustoko izan Eñautek
«Ni aurrelaria naiz» dio Eñaut gazteak eta «ni atzelaria» erantzuten du Ekainek. Ezaugarriak ere desberdinak dituzte nahiz eta biak ere indarreko pelotariak izan. «Jokaldia egitea gustatzen zait» argitzen du aurrelariak, «ni berriz jotzailea naiz. Pelota atzeratzea da nire ezaugarri nagusia» Ekainen esanetan.
Etxean biak animatzen dituzte eta mezu argi bat dute: «ongi pasatzeko» esaten diete. «Eta ahal duguna egiteko» gogoratzen du Eñautek. Pelota asko bizitzen dute eta bide horretatik jarraitu nahi dute.
Hodei Exposito eta Joxe Mari Zubiarrain dituzte entrenatzaile Mundarroko taldean. Laguntzaile Petritegi sagardotegia dute eta faltan botatzen dutena jende gehiago pelotan aritzea da. «Jende gutxi dabil, kantitate aldetik oso exkax gaude eta herriartekoan bertan justu osatzen ditugu bikoteak. Kadeteetan bikote bakarra gaude eta jubeniletan ere beste bikote bat bakarrik. Gustatuko litzaiguke jendea animatzea pelotan jokatzera» aipatzen dute. Oraindik ere urruti egon arren herriartekoan elkarrekin jokatzeak ilusio berezia egiten die. «Aurreko urtean bi partiduak irabazi genituen, nahiz eta lehendabizikoan joan ginen kalera».
Eñaut Lizeagak gustokoena duena lau t’erdia da. «Gehien hor gozatzen dut. Banaka eta lau t’erdi barruan». Ekain berriz erosoago dago «binaka eta atzelari bezela». Dudarik gabe gertutik jarraitu beharreko anaiak dira Ekain eta Eñaut Lizeaga.
«Trinketean ez dugu entrenatzen eta nahiago dugu ezker pareta»
«Txapela ateratzeak ilusioa piztu digu eta Euskal Herrikoan ere jokatu nahi dugu»
Trinketean edo frontoi luzean aritzen dira Lizeaga Otaño anaiak. Pasa den astean elkarrekin Euskal herriko Liga hasi zuten jokatzen eta erraz irabazi zieten Tolosako bikoteari, 22-4. Trinketean elkarren aurka aritu dira finalean, Gipuzkoako Txapelketan, nahiz eta asko ez jokatu trinketean. «Nahiago dugu frontoi luzean jokatu, trinketean baino. «Entrenamenduak Txomiñenean egiten ditugu eta trinketean partiduak bakarrik jokatzen ditugu». Behin bakarrik entrenatu omen zuten finalaren aurretik. Eñautentzat esperientzia berria izan zen. «Izena eman genuen eta ongi gindoazela ikusi genuen» azpimarratzen du Ekainek eta «txapela ateratzeak ilusioa piztu zigun» gehitzen du Eñautek.
Aurrerantzean ere trinketean jokatzeko intentzioa dute. «Euskal Herrikoan ere nahi dugu jokatu». Hori bai, elkarrekin jokatzeko gogo biziz daude. «Nik aurreko urtean binaka jokatu nuen baina Eñaut oraindik ez zen kadetea eta ezin genuen elkarrekin jokatu. Orain bai» azpimarratzen du Ekainek.
Gipuzkoako Txapelketan, frontoian binaka, elkarrekin hirugarren amaitu zuten eta orain Euskal Herrikoan gogo haundiak dituzte beste herrialdetako bikoteekin lehiatzeko. «Elkarrekin oso ongi moldatzen gara. Gainera lehendabiziko urtea da batera gaudela. Infantiletan bakoitzak beste bikotekidea genuen». Banakakoan frontoi osoan Ekain finalerdietara iritsi zen Eñaut berriz finalaurdenetara. «Ez nintzen gustora aritu» dio gazteenak.
Txapelketa pribatuetan ere hara eta hona ibiltzen dira. «Nafarroan hasi gara jokatzen eta finalaurdenetan gaude. Bitik bi partidu irabazi ditugu. Beste herrialdeetakoen aurka lehiatzeko gogoa dugu».