Urte berria hastearekin batera, herriz herri egitasmo berria jarri nahi du martxan Orreaga taldeak, eta Hernanin ere izango dira.
Politikaldia Nazio Estrategian izena du egitasmo berriak, eta lau lansaiotan hainbat kontzeptu lantzea da asmoa. Saio horiek Hernanin emango dira, taldea sortuz gero.
Azalpenak eta eztabaidarako tarteak
Lansaio bakoitzean gai bat landuko da, bi ordu inguruko saioan; aurrena, ordubete inguruko azalpenak emango dira, eta gero, eztabaidarako 45 bat minutuko tartea irekiko da.
Aurreneko saioan Kontzeptu politikoak izango dira hizpide. Hainbat kontzeptu politikoren esanahia «etsaien eraginez erabat manipulatuta» daudelako, sortu den nahasmenetik ateratzea izango da helburua.
Bigarrenean Autodeterminazio eskubideaz ariko dira. «Erabakitzeko eskubidearen eta autodeterminazio eskubidearen arteko aldeak» azalduko dituzte.
Hirugarren saioari, berriz, Arazo nazionala eta lehen arazo soziala izenburua jarri diote, bi kontzeptuen arteko «dikotomia sozial-inperialismoak txertatu» zuelako, eta «arazo nazionala delako herri guztien lehen arazo soziala».
Bukatzeko, Subjektu politikoa izango da azken saioko gaia. «Politika, benetan politika bada, ekintzan oinarritzen da. Ekintzak. halabeharrez, subjektu batek eginak dira. Politika soziala denez gero, subjektu politikoa kolektiboa da».
Izenemateak, hila bukatu arte
Saio hauetan parte hartzeko, urtarrila bukatu arte eman daiteke izena. Horretarako, info@orreagataldea.com helbide elektronikora idatzi behar da.
Taldea sortu ahala erabakiko da saioak non eta noiz egingo diren.