Abenduan martxan jarritako proiektuari jarraipena ematen ari dira Kontrakantxa Gaztetxea eta Hernaniko Langileon Babes Sarea, eta horregatik, gaur berriro irekiko da gaztetxean, jantoki soziala.
Hileko azken ostiralero irekiko dute, 13:00etatik 15:00etara. Helburua da behar duenari otordu bat egiteko aukera ematea, doan. Honekin, «merkatu kapitalista gainditu eta gure beharrak autogestioaren bitartez lortzeko» asmoa adierazi dute. «Jendeak jatekorik ere ez duen garaiotan, elkartasuna da gure armarik indartsuena. Gure arteko babesa eta kidearekiko zaintza baitira kapitalaren aurkako borroka artikulatzeko dugun bide bakarra».
Bilketak ere, hilero
Jantoki soziala hileko azken ostiralero irekitzeaz gain, hilero, aurreko asteazkenetan janari bilketa egingo dute: «proteinak, barazkiak, fruta, gazta...». Deia ere luzatu dute, «ahal duzun moduko ekarpena» egiteko.