Joan den larunbatean jokatu zen Andoainen, Leitzaran ibaian, hirugarren eta azkeneko jardunaldia, Eulizko Salmonidoen Gipuzkoako Binakako Ligan. Eta txapelketa bikaina borobilduta, sari nagusia lortu zuen Epeleko Alex Ugaldek, Soriako Bittor Garciarekin bikotea osatuta.
Urrian eta abenduan jokatu ziren aurreko bi jardunaldiak; eta azkenekora, lider iritsi ziren Ugalde eta Garcia, baina haien puntu berdinekin zeuden Iñaki Muñoz eta Pedro Jimenez. Larunbatean, ordea, gehiago izan ziren Hernaniko eta Soriako arrantzaleak.
Gipuzkoako Ligako irabazle izateagatik, txapela, trofeoa eta 800 euroko saria eskuratu zuen bikoteak. Baina beste sari bat ere lortu zuten: beraiek atera zuten, txapelketako amuarrainik haundiena.