Tabernetako Bertsolari Txapelketa uskeria denik ez pentsa, hantxe agertu baitzen prentsa. Eta baten batek portadan agertzea zuenez ametsa, Kronikak debalde bete dio; hori da hori, pagotxa!
Ohi bezala, San Sebastian bezperarekin egin zen, baina 25garren urteurrena izanik, arratsaldetik hasi ziren, bertso-poteoan. Garinen jarri zuten saltsarik haundiena, hala ere.
Txapela Aingeru Otxotorenak jantzi zuen azkenean, buruz burukoan Estebanekin arituta. Beteranoak burua ezin estali geratu dira, beste behin.
Aurretik sari gehiago ere banatu ziren, hala ere: Estitxuk jaso zuen aurrenekoa, Otsaihen eskuan kantatzeagatik. Inbidiak jota, gauza bera egiten hasi zen Andrew, eta Karabeleko ere aipatu zuen, badaezpada; horrela lortu zuen bigarren Otsaihen saria! Hirugarrena, publikotik begira ari zen Beñat Iguarani eman zioten. Limurtu beharreko epaimahaikidea, ordea, ezkutuan zegoen, epaile ofizialen atzean eserita...
Datorren urtean emakume gehiago izango direla promesarekin bukatu zuen Izarok saioa, Aingeruren agurreko bertsoaren aurretik.
Aingeru Otxotorenaren agurreko bertsoa
Zerbait izan nahi horrek
kontzientzian datza
bizitza proiektu bat
jantoki, baratza
gaur nere alde jarri
zaigunez balantza
txapela zuentzako
dijoanez antza
eskerrikasko eta
gora Kontrakantxa!