Bi final jokatu zituzten larunbatean, pelotari astigartarrek, Irurako Ametsa trinketean. Eta horietako bat zen bereziki erakargarria, kadete mailakoa, aurrez aurre ariko baitziren Lizeaga anaiak, txapelaren bila.
Eñaut nagusitu zen azkenean, anai zaharrena, Ekaini 30-18 irabazita. Berak ekarri du Gipuzkoako Trinkete Txapelketa honetako txapela bakarra, Astigarragara.
Izan ere, irabazteko aukerarik ez zuen izan Oier Gurutzealdek, larunbateko beste finalean, nagusien lehenengo mailakoan. Ligaxkan berak irabazi bazion Eneko Maiz billabonatarrari, oraingoan sekulako mailan aritu zen Maiz, eta ez zuen bere egunik onena izan Gurutzealdek. Azkenean, 12-40 nagusitu zen Billabonako pelotaria.
Edozein kasutan, txapelketa ederra osatu dute hiru astigartarrek. Gurutzealdek berak eta Ekain Lizeagak, finala bakarrik galdu dute. Eñaut Lizeagak, berriz, partidu bakar bat ere galdu gabe jantzi du txapela.
Euskal Herrikoan irabazi, Lizeaga anaiek elkarrekin
Lizeaga anaiek, beste partidu bat ere jokatu zuten ostiralean Astigarragan, baina elkarrekin: 22-4 irabazi zieten, Euskal Herriko Ligako bigarrena, Tolosako Amiano eta Suduperi.