Piztu Itxaropena XV. Sahararen aldeko euskal karabana martxan dago, eta bilketak antolatu dira Hernanin eta Astigarragan.
Hernaniren kasuan, etenik gabe ari dira biltzen Biterin eta eskoletan, eta azken bilketa kanpaina egingo dute ostiral eta larunbat honetan, supermerkatuetan.
Astigarragari dagokionez, ostiralean bukatuko da bilketarako kanpaina. Laguntzeko produktuak komertzio hauetan utzi daitezke: Tomas Alba kaleko Isabel dendan, Norberto Almandoz plazako Ainhoa Coviranen, Ezpela belar-dendan, Alicia fruta-dendan, eta Zubitxo eta Eroski supermerkatuetan.
Bi kasuetan, ondorengo produktuak ari dira jasotzen: arroza, lekaleak, pasta, hegaluzea eta sardinak oliotan, konpresak eta azukrea.
Astigarragan, «EH Bilduk hartu behar izan du ardura»
Kanpaina honekin Tindoufeko Saharako errefuxiatu kanpamenduetan bizi direnak laguntzen dira.
Astigarragako EH Bilduk azaldu du komertzioek eta Herri Eskolak bat egin dutela kanpainarekin, baina salatu du, «oraingoan ere, EAJren legealdi osoan bezala, Udal Gobernu taldeak ekimena antolatzeari uko egin» diola, eta «Astigarragako EH Bilduk antolatzeko ardura hartu behar» izan duela.
Izenematea irekita, haurrak udaran hartzeko
Bestalde, Oporrak Bakean programaren kanpaina berria ere jarri da martxan. Aurten, udaran haur errefuxiatu sahararrak harreran hartzeko 100 familia behar direla adierazi dute; 2018an 316 neska-mutil saharar etorri ziren Euskal Herrira.
Helburua da 10-12 urte bitarteko haur sahararrek udako bi hilabeteak Euskal Herriko familiekin pasatzea, basamortuko baldintza gogorretatik urrundu, mediku azterketak egin, elikadura egokia jaso, eta euskal eta saharar kulturen arteko loturak sustatzeko.
Izena eman edo informazioa lortzeko, oporrakbakean.eus webgunea bisitatu edo 696 014 786 telefonora deitu daiteke, Gipuzkoako kasuan. Udaletxeek laguntzak ere ematen dituzte, eta Hernaniko zerbitzuaz galdetzeko, 943 33 70 17 telefonora deitu eta marijo-m@hernani.eus helbide elektronikora idatzi daiteke.