Azkenekoz, 1986an sailkatu zen Hernani, Errege Kopako finalerdia jokatzeko. Ez du sekula finala jokatzerik izan, eta hori aldatzeko asmoz zelairatuko dira gaur jokalariak, 12:00etan Landaren. Laugarren finalerdi hau Bartzelonaren aurka jokatuko dute.
Azken emaitzen bidetik
Ez da aurkari erraza izango, baina baliteke beste finalerdia jokatuko dutenak baino xamurragoa izatea: Alcobendas eta El Salvador.
Dena den, Hernanik hobe du azken lorpenei begiratu, eta bide beretik segi. Bartzelona Errege Kopa gehien irabazi dituen taldea da, 16 denera, eta etxetik kanpo ere partidu gehien irabazi dituena. Baina Hernaniren aurrean Landaren jokatu zuen azkenekoa galdu egin zuen. Era berean, pasa den igandean Hernanik irabazi egin zuen La Vilaren aurka, eta hain zuzen, ia jokalari berak zelairatuko dira gaurkoan. Hiru laurdeneko lerroko jokalari garrantzitsuak berreskuratu ditu Polidorik azken hilabetean eta hori nabari da.
Horrela ba, apirilaren 28an Madrilen jokatuko den finalean izan, eta amestutako Kopa aurrenekoz altxatzeko ezinbesteko pausoa ematea izango dute helburu gaur hernaniarrek; zaleen bultzadarekin, beste behin, historia egiteko.