Etxez etxe banatu zuen Udalak irailean Foru Aldundiak eskaintzen duen garraio publikoaren zerbitzua baloratzeko inkesta. Astigartarren iritzia jasotzeko asmoz egin zuten; eta horiek aztertuta, balorazioa egin dute.
268 iritzi, bi astetan
Astigartarrek bi aste izan zituzten, beren iritzia emateko, izan emailez, herrian zehar jarritako kaxetan, edota alkatetzan. Hain zuzen, 268 inkesta jaso dituzte, astigartarren %5aren iritziaren berri izan du Udal gobernuak.
Udalak azaldu duenez, «inkestak bost galdera zituen. Autobusaren erabileraren maiztasuna galdetzen zuten, lehenengo, eta hiru aukera zeuden. Bigarren, zerbitzuaren maiztasunaren inguruko iritzia eskatzen zuten, baita herrian zeharreko ibilbidearen eta geltokien kokalekuaren ingurukoa ere. Herrian zeharreko autobus zerbitzu propio baten beharraz ere galdetzen zuten; eta azkenik, tartea zegoen proposamenak egiteko».
Hainbat eskaera
Datuei dagokionez, «galdetegia erantzun duten pertsonen %80ak oso maiz erabiltzen du garraio publikoa; %19ak, aldiz, noizean behin erabiltzen du». Era berean, «%70ak uste du egungo zerbitzuak eskasak direla, eta %29a, aldiz, konforme dago maiztasunarekin».
Ibilbideari eta geltokien kokapenari dagokionez, «%83ak eta %87ak, hurrenez hurren, uste du egungo zerbitzuak ez duela aldaketarik behar».
Udalak adierazi du, baita ere: «herri barruko autobus zerbitzuaren emaitzak ez dira ondorioztagarriak, izan ere, Astigarragan badaude auzo batzuk (Perurena, Santiomendi...), beste batzuk baino lotura behar haundiagoekin».
Eskaeren artean, badaude batzuk maiz errepikatzen direnak; horiek dira: batetik, Astigarraga ospitaleekin eta unibertsitateekin lotzen dituena; eta bestetik, maiztasun gehiago, bereziki, A2 zerbitzuan. Errefortzu puntualak ere eskatzen dira, informazio gehiago edota autobusen garbiketa hobetzea.
«%70ak uste du egungo zerbitzuak eskasak direla, eta %29a, aldiz, konforme dago maiztasunarekin».
«Astigarragak ez dauka garraio alternatibarik»
Foru Aldundiko Mugikortasun sailera bideratuko dituzte inkesten emaitzak, «Buruntzaldeako zerbitzuen berrantolaketa berpentsatu dezan, Astigarragari zuzenean eragiten baitio». Udala iaz ere zuzendu zen bertara, bereziki «azken urteetan izan duen hazkundea medio».
Gainera, «Astigarragak ez dauka garraio alternatibarik, beste herriek bezala. Tren geltokia ez dago martxan oraindik, eta Udal gobernuak nahi du herriak duen zerbitzu bakarra egokia eta kalitatezkoa izatea».