Ez zuen ezer aldatu, baina pasa behar izan zuten tramitea izan zen larunbateko jardunaldiarena.
Gipuzkoako Bio Racer txapelketari zegokion azkeneko saioa burutu zuten orduan Urko Semperenak eta Xabier Mikel Azparrenek. Izan ere, Jaime Romero gaixo zegoen eta Telmo Semperenak, aldiz, beste proba bat jokatu zuen egun berean.
Dena den, Romero eta Semperenak, sari potoloena ziurtatuta zeukaten, norberaren kategorian, aurreko jardunalditik. Hori horrela, Urko Semperena izan zen garaile 23 urte azpiko kategorian; eta Jaime Romero, aldiz, junior mailan. Telmo Semperena bosgarren izan zen juniorren artean.
Bordelen, Telmo Semperena
Esan bezala, beste proba bat jokatu zuen egun berean Telmo Semperenak, hori izan zen, hain zuzen, Bordeleko Omniuma. Lau proba burutu zituen bertan, eta zazpigarren bukatu zuen. Eliminazio proban, gainera, bigarren izan zen.
Asteburu honetan, Palma de Mallorcan izango da Semperena, Romerorekin batera, Euskal selekzioarekin, Espainiako Koparen aurreneko jardunaldian. Urko Semperena, aldiz, Omniumeko Espainiako Txapelketan arituko da, asteburu honetan.