Hutsik egin gabe, seigarren edizioa izanen du aurtengoa, Goizutrail mendi lasterketak; eta maiatzaren 11n eginen da. Izenemateak ere zabalik daude dagoeneko, www.herrikrosa.eus web orrian.
Baina aurten, nobedaderik ere izanen du lasterketak. Bi proba ez, hiru izanen dira aukeran oraingoan. Horrela, 10 eta 25 kilometroko ibilbideak mantenduko dituzte, bakarka egiteko; eta hirugarren aukera, bikoteka izango da. Binaka izena ematen dutenek, ibilbide luzea osatuko dute, bien artean: aurrenekoak 10 kilometrokoa osatuko du, eta herrira bueltatzen denean, bigarrenari emanen dio erreleboa, beste 15 kilometroak egiteko.