Datorren asteazkenean hasiko da txotx denboraldi berria, Astigarragan. Urtarrilaren 16a izango da aurten, Sagardo Berriaren Eguna, eta eguerdiko 12:00etan jarri dute zita, Sagardoetxean. Uzta berria aurkeztuko du Zorione Etxezarraga alkateak, eta sagarraren eta sagardo berriaren ezaugarrien berri eman. Bertan izango da Olatz Arrieta kazetari astigartarra ere, aurtengo omendua.
Berak landatuko du sagarrondo berri bat Sagardoetxeako sagastian, ekitaldiaren ondoren, 12:45ak aldera. Eta gero, 13:30etan, berak egingo du txotx aurrenekoz, Gure sagardo berria! oihu eginez, Gartziategi sagardotegian.
Aurretik, sagar dantza dantzatuko dute, txalapartarien deiarekin batera; eta soka dantza gero sagardogileek, Olatz Arrieta kupelara gerturatzeko.
13:45ak aldera izango da momentu berezia: kupela ireki, eta 2019ko txotx denboraldiari hasiera emango dioten unea.
Irekiera herrikoia, Murgian
Gartziategin izango bada hori, txotx irekiera herrikoia egingo dute aurten ere, Murgia Jauregian. 12:00etatik 14:00etara, irekiera ofiziala emango dute zuzenean, eta pintxo eta sagardo dastaketa ere izango da. Emakume ekintzaileak sagardogintzan erakusketa ikusgai egongo da, eta 12:30etan, bisita gidatua egingo du Lourdes Odriozola historialariak.
Arratsaldean, haurrentzako emanaldia izango da Txan Magoarekin, 17:00etan hasita. Txokolatada egingo dute gero, 18:00etan, eta azkenik, Pintxotx herrikoia izango da, 18:30etatik 20:30etara, tabernetan: pintxo bereziak euro batean, sagardoa txotxetik, eta Norberto Almandoz Musika Eskolako trikitilariak kaleak alaitzen. Bukatzeko, afari herrikoia egingo dute Petritegin, eta izena eman behar da: tabernetan, Sagardoetxean, info@sagardoarenlurraldea.eus edo 943 55 50 57. 20 euro dira.