Txapelarik ez zen geratu etxean, Umore Ona Txapelketan

Festa ederrarekin agurtu zuten Umore Ona Txapelketa, aurreko larunbatean. Baina ezin izan zuen borobildu Xanet Apezetxea goizuetarrak, eta 10-18 galdu zuen, Ilunpeko Labaka eta Artetxe azpeitiarren kontra, kimuetan. Haurretan, Deskarga eta Alegria hernaniarrak nagusitu ziren (18-11); umeetan Iturain eta Bergara errenteriarrak (18-11); eta 22 urtez azpikoetan Etxezarreta eta Arrate andoaindarrak (22-18). Bestalde, sariak zozketatu zituzten, eta urtarrilaren 27ra arte dago epea, horiek  jasotzeko: Aimar Olai­zo­laren kamixeta (171 zenbakia), Jokin Altunaren kamixeta (214), Olaizola sagardotegian bi lagunentzako otordua (795), Zubimuxu aterpetxean bi lagunentzako gau bat (1840), Errigorako saskia (2031), Oxeguardan bi lagunentzako otordua (2590), eta Joseba Ezkurdiaren kamixeta (3836).