2019ko jabetze eskolak gaur hasiko dira eta lehendabiziko eskola Emakumeen nortasuna eta subjetbitatea gaia hartuta izango da. Bertan harreman parekideak eta tratu onekoak aztertuko dira. Biteri kultur etxean emango ditu Pepa Bojó Ballester irakasleak eta ordutegia 18:00etatik 20:00etara izango da. Gaztelaniaz emango ditu eta guztira 22 ordu izango dira. Horrek esan nahi du martxoaren 29ra arte luzatuko direla hamaika ostiraletan. Matrikula 22 eurokoa da.
«Norberarekiko eta besteekiko tratu onak» lantzea, asmoa
Antolatzaileek tratu onen proposamena dakarkite eskoletan. «Gure jendarte patriarkalak ezberdintasunean, hierarkizazioan eta konfrontamenduan oinarritutako botereharremanak sortzen ditu. Horren guztiaren atzean ikasitako eta barneratutako hainbat sinesmen, rol, jarrera, estilo emozional... daude, eta haiek azaleratu beharra dago aldaketak gauzatzea nahi badugu. Horretarako tratu onen proposamena dakarkigu, norberarekiko eta besteekiko tratu onak lantzeko asmoz: norberarengan konfiantza, autozaintza, mugak ezartzea, enpatia, errespetua, onarpena, entzutea…».
Hamaika saio hauen bidez harremanen inguruan hausnartzeko gune bat sortzen saiatuko dira jabetze eskoletan. «Harreman horiek gure bizitzetan dituzten ondorioak ikusteko eta aldaketa positiborako tresnak bultzatzeko dira».