Eguna eta tokia aldatu, eta gaur egingo dute Hernaniko txotx irekiera, 19:30etan Tilosetan. Tokia bereziki aukeratu dute: Hernaniko Pelota Mundua izango da aurtengo omendua, txotx denboraldi berriaren aurreneko pelotakadak emateko ekitaldian.
Horrela, herriko hiru modalitateak omenduko dituzte, eta esku pelotako 12 ordezkari, palako zortzi, eta erremonteko hiru egongo dira bertan.
Esku pelotatik, honakoak egongo dira bertan: Miguel Ezpeleta eta Martin, Herriarteko aurreneko finala jokatu zutenak; Josu Oiaga eta Felix Zabala, Herriarteko aurreneko txapelan protagonista; Iñaki Lujanbio, eta Iñaki Esnal profesional izandakoak; Unai Alvarez, hiru aldiz munduko azpitxapeldun trinketean; Aitor Gorrotxategi munduko txapelduna, Ioritz Arrieta eta Paul Ojuel, oraingo belaunaldiaren ordezkari; Joxe Miguel Azurmendi, delegatu izandakoa; eta Rufino Rekalde, pelota saileko arduraduna.
Pala sailetik, berriz, Garbiñe Tijero arduradunarekin batera, egongo dira Mundialak jokatu izan dituztenak, trinketean, frontoian zein One Wallekoan, Hernani ordezkatuz: Goiatz Manzisidor, Irati Ugalde, Amaia Irazustabarrena, Maider Huizi, Ariane Arrieta, Amaia Araiztegi eta Patri Espinar.
Eta azkenik, erremontea ordezkatuko dutenak, izango dira Endika Barrenetxea erremontista, Joxe Mari Barrenetxea eta Xabier Gonzalez.
Guzti horietatik, Aitor Gorrotxategi, Garbiñe Tijero, Amaia Irazustabarrena eta Endika Barrenetxea igoko dira taulara.
Ekitaldiaren aurretik, pelota partiduak izango dira Tilosetan; eta ondoren, Gu Agustina dantza ikuskizuna.
HERNANIKO TXOTX IREKIERA
GAUR, Tilosetan
18:00-19:00, Esku pelota partiduak Tilosetan; benjamin eta alebinak.
18:45-19:30, Trikitilariak, herriko kaleetan zehar.
19:30, Txotx irekiera, Tilosetan, Hernaniko Pelota Munduko omenduekin: esku pelota, pala eta erremontea.
20:00-20:30, Gu Agustina dantza ikuskizuna. Ereintza dantza taldeak emakumezko raketistek ibiliaren inguruan osatutako ikuskizuna.