Urteari agenda beteta ekin diote, Kontrakantxa Gaztetxean. Hil honetarako hainbat ekintza antolatu dituzte, eta horietako hiru datozen egunetan izango dira.
Rosa Luxemburgo aztergai, bihar
Hasteko, bihar arratsaldeko 18:00etan hasita, Rosa Luxemburgo marxistaren obra izango dute hizpide, filosofiako ikasle ohi batek gidatuta.
Herenegun bete ziren 100 urte Rosa Luxemburgo poloniar judutar marxista hil zutela, Karl Liebknecht politikari alemaniar komunistarekin batean. Hala ere, Luxemburgoren «Erreforma ala Iraultza obraren gaurkotasuna» kontuan hartzekoa dela azalduko da, besteak beste.
Maravillas babesteko, manifestaziora autobusean
Hurrengo zita larunbaterako jarri dute Kontrakantxako kideek, eta herritar guztiei zabaldu diete deialdia, parte hartzeko. Maravillas gaztetxearen itxieraren kontra, manifestazioa egingo da Iruñean, 17:00etan Udaletxe Plazatik abiatuta, eta bertara joateko autobusa antolatu dute Hernanitik.
Jantoki soziala urtarrilaren 25ean irekiko da berriro, eta hileko azken ostiralero irekiko da.
Eguerdiko 12:30etan aterako da Kontrakantxa Gaztetxe paretik, eta bertarako izena emateko zerrenda Garinen dagoela jakinarazi dute.
Jantoki soziala azken ostiralero, HLBSren eskutik
Bestalde, Hernaniko Langileon Babes Sareak, Kontrakantxa Gaztetxearekin elkarlanean, abenduan martxan jarritako proiektuarekin aurrera jarraituko duela azaldu du; jantoki sozialarekin, hain zuzen. «Elkartasunaren balioa zutarri gisa harturik, langileriaren estraktu zapalduenari bere beharrak asetzeko baliabideak eskaini nahi dizkiogu. Hori horrela, azken hilabeteetan gure egunerokoa aldatzea helburu duten pausuak ematen hasi gara. Besteak beste, baratzean lanean eta jakintzaren kolektibizaziorako tailer ezberdinak egiten. Guzti hori merkatu kapitalista gainditu eta gure beharrak autogestioaren bitartez lortzeko asmoz. Jantoki soziala beste adibide bat besterik ez da».
Urtarrilaren 25ean irekiko dute berriro, bazkalorduan, eta hileko azken ostiralero irekiko dutela zehaztu dute.
Era berean, herri janari bilketak ere hilero egingo dituztela jakinarazi dute; kasu honetan, azken asteazkenetan. Laster jakinaraziko dute zein komertziotan egingo den bilketa.
Soinu tailerra, otsailetik ekainera bitartean
Bestelako ekintzak ere ari dira antolatzen: zine saioak, jam session... Eta beste hainbeste ere antolatuko dituzte.
Horietako bat, soinu tailerra. «Benetako musika ekipoa erabiltzen ikasteko tailerra» izango dela zehaztu dute, eta izenematea ireki dute. Edonrk eman ahal izango du izena, adina edozein dela ere, eta tailerra doan emango da. Izena emateko, 680 942 101 telefonora edo kontrakantxamusika@gmail.com helbide elektronikora idatzi behar da. Aurreratu dute, besteak beste, Gaztetxean zuzenean praktikak egiteko aukera izango dela, kontertu eta entsaioetan, eta Molotoff Irratiarekin irratsaioa egitekoa