Badirudi Hernaniko Ohorezko Mailako errugbi taldeak historia egiteko aukera izango duela berriro igandean, eta seguru, ez duela aukera galduko. Eguerdiko 12:00etan jokatuko du, Landaren, Errege Kopako finalerdia, Bartzelonaren kontra.
Lehia honetan azken garaipena 1988an lortu zuen Hernanik.
Aurkarietan xamurrena, baina gogorra
Zozketen arabera, lau multzotan jokatu dituzte sailkapen faseko partiduak, talde guztiek. Hernani hirugarren multzoan aritu da, eta finalerdirako sailkatu da La Vilari 29 eta 38 eta eta Gernikari 35 eta 27 irabazita.
Finalerdian aurrez aurre Bartzelona izango du. Honek Cisneros eta Valladolid gainditu ditu. Beste finalerdia jokatuko duten bi taldeak, berriz, Alcobendas eta El Salvador dira.
Beraz, aukeran, aurkarien artean xamurrena izan daitekeena egokitu zaio Hernaniri, sailkapenean bigarren eta hirugarren postuan baitaude sailkatuta, hurrenez hurren, Alcobendas eta El Salvador. Baina Bartzelona bosgarren dijoa, eta Errege Kopa gehien irabazi dituen taldea da. 16 irabazi ditu, hain zuzen, nahiz eta azkenekoa 1985ean eskuratu zuen. Gainera, etxetik kanpo partidu gehien irabazitako taldea da, aurtengo Heineken Ligan. Beraz, Hernanik etxean jokatzea aldeko badu ere, agian ez da hainbesterainoko traba izango arerioarentzat. Dena den, bi taldeen arteko Ligako azken norgehiagoka, hau ere Landaren jokatua, etxekoen aldekoa izan zen, 20 eta 13. Era berean, pasa den asteburuan La Vilaren aurrean garaipen garrantzitsua lortuta iritsiko da Hernani, partidu honetara.
Loterian jokatutakoa jasotzeko aukera
Bestalde, Hernani CRE klubak jakinarazi du Errugbi Barneratzailea taldeak saldutako El Niño loterian jokatutakoa tokatu dela, eta hori kobratzeko, elkartearen bulegotik pasa behar dela, astelehenetik ostiralera, 17:30etatik 19:30etara.