Sagardoaren Lurraldeak antolatuta, gaur irekiko dute ofizialki Astigarragako txotx denboraldia. Olatz Arrieta kazetari astigartarra izango da aurtengo omendua, denboraldiko aurreneko txotxa egingo duena. 1994 urtetik Gure sagardo berria oihukatuko duen hirugarren emakume omendua (taldeak kontuan hartu gabe).
Aurkezpena eta sagarrondo berria, Sagardoetxean
Eguerdiko 12:00etan emango zaio hasiera aurtengo ekitaldiari. Sagardoetxean izango da hori; 2019ko denboraldiaren eta 2018ko uztaren berri emango dute bertan. Ondoren, sagarrondo bat landatuko du Olatz Arrieta aurtengo omenduak.
Handik, Gartziategi sagardotegira pasako da festa. Eguerdiko 13:30etan, txalapartarien deialdiari segika, soka-dantza dantzatuko diote sagardogileek Arrietari. Horrela gonbidatuko dute aurreneko kupela irekitzera.
Herritarrekin, Murgian
Irekiera ofizialarekin batera, bitartean, herritarrek ere izango dute aukera txotx denboraldiaren hasieran parte hartzeko. Murgian. Bertan, zuzenean emango dute ekitaldia, pintxo eta sagardo dastaketarekin. 12:30etan, Emakume ekintzaileak sagardogintzan erakusketa gidatua izango da.
Arratsaldean ere izango da zer gozatua: 17:00etan, Txan Magoa; 18:00etan, txokolatada; eta 18:30etan, trikitilariak abiatuko dira, tabernetako pintxo-potera. 21:00etan, afaria izango da, Petritegi sagardotegian.