Bakerotarrak 2004an hasi ziren talo postua jartzen Goizuetako ferian, eta ordutik urtero-urtero jarri dute hutsik egin gabe, urte hauetan eta 15 edizioetan. Izaskun Bakero izan da hamaika anai-arrebetatik ardura hartu zuenetakoa eta inork baino hobeto ezagutzen ditu postuaren nondik norakoak.
Postuaren atzean dagoen historia, lana eta betebeharrak azaltzen ditu. «Azken feria inoizko hoberena izan zen, dena perfekto, ezin hobeto joan zen eta bildutako dirua buruhaundi eta erraldoiak konpontzera bideratuko da». Hori baita urtero biltzen den diruaren etorkizuna, Goizuetak eta herriko elkarteen gabeziak baretzea eta irtenbidea ematea ahal den neurrian.
«Erraldoiek erosoago eta eramangarriago izateko aldaketak behar dituzte. Barruan daudenak kexatu egiten dira, min egiten baitute sorbaldan».
2004garren urtean Goizuetako Kultura batzordekoak harremanetan jarri ziren Izaskun Bakerorekin, galdetzeko ea ausartuko zen postua jartzen. «Etxean egiten genituen taloak lagunekin». Baina postua bakarrik jartzea ezinezkoa zela azaldu zeun Izaskunek, eta antolatzaileek beharrezko materiala jarriko zutela esan zioten. «Ez genuen ezer ere. Komentatu nien materiala jarriz gero ni saiatuko nintzela taldetxoa osatzen». Eta zer hobe, taldea etxekoekin osatzea baino. Honela hasi ziren bakerotarrak talo postuarekin.
«15 pertsona aritzen gara postuan, hamabi barruan eta beste hiru laguntza ematen kanpotik»
«Koinatak, ahizpak, hiru lagun min... denen artean osatu genuen taldea. Mutilek lan mota batzuk egiten dituzte; esaterako, txapak alde batetik bestera mugitu, karga haundia baitute; muntaian…». Guztira «hamabost bat persona» aritzen dira lanean egun horretan, eta «postuan, hamabi».
Bakerotarrek jende faltarik ez dute, sendi haundia dira eta. «Zentzu horretan abantaila dugu bai. Lau ahizpa egoten gara postuan, koinata, senarraren aldeko beste bi koinata ere bai… gehienak bertakoak». Hamaika anai-arreba dira guztira. Iñaki Bakerok ere, erraldoiean ardura ere badaramanak, lagunten du postuan.
Talo bereziak egiten dituzte eta jendez gainezka daude
Gainera bakerotarren taloak badute berezitasuna. «Normalean postuetan tolestu egiten da taloa, baina guk ez. Erditik irekitzen ditugu, barruan sartzen ditugu eta berriz ere txapan jarri gazta urtu arte; Goizuetan marrukoa esaten zaio, berriz sartu eta txapara». Etxean egin izan duten eran egiten dute Goizuetako ferian.
Bi egoten dira txapetan, bi orea egiten, beste bi zabaltzen, bestea txistorra eta hirugiharrarekin, beste bi ireki eta sartzen, bestea komandak hartzen... ez da lanik faltatzen. «Herriari laguntzeko denak beti prest». Olaizolatarrek ere edaria jartzen dute. «Sagardo barrika da beraien kolaborazioa».
Egun haundia izaten da Goizuetan feria eguna eta aurten oraindik eta arrakastatsuagoa izan omen da. «Jende asko biltzen da eta eguraldiak eragina izaten du. Aurten pasada bat izan da» dio Izaskunek. «Orain arte gehien lan egin dugun edizioa. Festetako egun bat bezala izaten da, egun latza». Urtetik urtera gero eta postu gehiago jartzen dira.
Egitasmoentzako laguntza eta aportazioak
Lehenengo urtean postua jartzerakoan inork ez zituen diru sarrerak kontuan hartu. «Kaos xamarra izan zen. Dena berria zen guretzat. Azkenean osatu genuen, goiza pasa ere bai eta diru bat lortu zen. Diru hori ez zen gurea, batzordekoeri hurbildu eta ez zuten pentsatu diruan. Momentu horretan herriko familia batek ezbehar bat izan zuen eta gure proposamena izan zen familia horri laguntzea. Horrela egin zen».
Hala ere Izaskun Bakero jakitun zen antolakuntza nahiko kaotikoa izan zela eta proposamen bat egin zuen. «Nik esan nien taloaren postuaren inguruan dena antolatuko nuela, nere esku hartuko nuela. Eta diruarekin zer egingo den ere bai. Horrela hasi ginen».
Izaskun Bakerok gogoratzen ditu lagundutako elkarte, talde, egitasmo… guztiak. «Beti izan dira aportazioak: Dantzako musika ekipoa erosteko, goizuetar bat Parisen atxilotutata zegoela-eta bisitan joateko autobuserako, herriko futbito elkarteko bi taldeentzako, gimnasioarentzako materialaren portearentzako eta aglomeratua jartzeko, gasolindegiaren lehendabiziko tramiteentzako, pilota eskolaren txapelketa berreskuratu ahal izateko lehendabiziko bi urteetan, haurtzaindegia martxan jartzeko, aurten erraldoientzako…».
Aportazioak urtearen arabera desberdinak
Generoa erosi, gastu guztiak osatu eta diru sarrerak kontuan hartuta geratzen den soberakina da aportazioentzako bideratzen dena. Taloa bi eurotan saltzen da eta lau euro eta erdian taloa nahi den osagaiarekin. «Feria 10:00etan hasten da eta gu zortzietarako bertan egoten gara dena antolatzen. Eguraldi txarra egiten badu eskolako frontoian jartzen gara, bestela Plazan. Eskertzekoa da bertan leku ederra eta erosoa uzten digutela. Ez daukagu azpiegiturarik kanpoan egoteko euria hasten badu».
Tresneria Izaskun eta senarrarena dira eta urte bakoitzean zertan huts egin den edo zer hobetu behar den hartzen dute kontutan hurrengorako. «Adibidez txapak Iñaki anaiak egin ditu, baditugu bost».
Lortu izan den dirua, normala denez, aldatzen joan da. «Ateratzen duguna da eskaintzen duguna. Ez dugu lana egiten gauza baterako. Han gaude eta lana egingo dugu. Gero datorrena ongietorria da. Gastu bezala ere sartzen dugu feriko bazkaria; hamabi lagunentzako txartelak erosten ditugu. Jeneroaren gastua, materialaren gastua eta txartelak ordaintzea dira gastuak, eta hortik aurrera ateratzen duguna da bideratzen dena aportazio bezala».
Eramangarriagoak egingo dira erraldoiak
Erraldoiak eramatea ez da erraza izaten eta Iñaki Bakero da koordinazio lanetan aritzen dena. Goizuetar gazteek eramaten dituzte erraldoiak eta jazten dituzte buruhaundiak. «Berriak dira erraldoiak, baina barrengo armadura oso gogorra da. Materialak arindu arren sorbaldan asko sartzen dira nahiz eta bigungarria jarri. Goizuetakoak Añorgara joaten dira eta ikusten dute arnes moduko bat dutela eramangarriagoa egiteko. Hori arintze aldera egokituko dira eta horretara bideratuko da aportazioa. Buruhaundien arropak ere berritu nahi dira posible baldin bada» dio Izaskunek.
Erraldoietako bat eramaten Izaskunen semea aritzen da. «Orain 19 urte ditu. Erraldoia eramateko indarra behar da eta jakin ere bai, ez da erraza. Buruhaundiekin ordea gaztetxoagoak aritzen dira. Bost buruhaundi daude Goizuetan eta festetan gehiago aritzen dira, kanpotik etorrita. Gu ere Añorgara mugitzen gara, asko laguntzen digute añorgatarrek».
«Aportazioak guk erabakitzen ditugu nori egin, beharren arabera»
Izaskun Bakerok herriaren beharrei erreparatzen die urtean zehar eta gero denen artean erabakitzen dute. «Ezin da promesarik egin, gero agian dirurik ez delako egongo. Konpromezua postua jartzea da».
Aipagarria da aportazioak egiterako garaian bakerotarrak beraiek direla erabakitzen dutenak nora bideratu. «Inoiz ez zaigu etorri elkarterik eta ez beste inor dirua eskatuz. Hori behin bakarrik gertatu zen. Pilota elkartetik txapelketa berriz antolatzerakoan ea babesle izan nahi genuen esan ziguten eta gu gustora». Izaskun Bakero bera izaten da herriaren beharrei erreparatzen diena. Gero, denen artean erabakia hartzen dute. «Belarria adi-adi jarri eta entzun egiten nuen nor zegoen beharrean: futbitokoak larri dabiltzala, haurtzaindegia martxan jarri nahi dutela... hori bai, beti zabaldu gabe. Ez da jakiten aurretik».
Kontuan hartu behar da feria egin aurretik postua jartzen duenak ez dakiela nola joango den salmenta, jenderik ibiliko den ala ez, diru sarrerekin gastuak estaliko diren ala ez. «Arriskatzen gara, jenero guztia erosten da, gastuak hor daude, eta aurretik ezin da esan diru sarrerak egitasmo batera bideratuko direnik. Pentsa gero ez dagoela dirurik».
«Nora bideratuko den dirua ezin da aurretik esan, ez baitakigu salmentak nola
joango diren»
Konpromisoa izan zen postua jartzea eta hori da betetzen dutena bakerotarrek. «Inork ez du dirurik eskatu eta hori ez da lehenesten dena, aportazioak egitea salmenten ondorioa dira. Gastuak kubritzea da helburua. Nik aipatzen dut ideia eta taldeak onartzen du». Izaskunek ere nabarmendu nahi du herriaren esker ona. «Errespetatzen da erabakia eta ongi moldatzen gara».
Herri batean beti daude beharrak eta ideiak ere ez dira falta. «Beste aportazio bat egin genuena izan zen giza futbolina ekartzeko festetan. Urtean zehar zerbait entzuten badut kontutan hartzen dut. Merezi duten gauza asko daude. Aurten aportazio polita egin ahal izanen da, baina beti ez da horrela izaten. Gutxiago edo gehiago beti egin da aportazioa eta jarraitu dezala horrela izaten».