Partidu oso garrantzitsu batekin hasiko du urtea, Hernanik: La Vila kontrario zuzena hartuko dute trikoloreek Landaren, bihar eguerdiko 12:00etan hasita. Irabazi beharreko partidua dute, beraz, mailari eusteko lehia horretan.
Berdinduta daude bi taldeak, sailkapenean, 22 punturekin; 9garren La Vila, eta 10garren Hernani. Eta puntu berberak dauzka Cisnerosek ere, 11garren. Hain justu, talde madrildarraren zelaian galdu zuen 2018ko azkeneko partidua, Hernanik.
Horregatik, indar berriekin ekin nahi diote urteari, zaleen aurrean. Bederatzi jardunaldi falta direnean, permanentziaren borrokan daude trikoloreak, bete-betean; eta puntu bakoitza izango da garrantzitsua.
Kopako semifinala, datorren igandean
Biharkoaren ondoren, hala ere, astebetez ahaztuko ditu permanentzia kontuak, Hernanik. Izan ere, Kopako semifinala jokatuko dute datorren igandean, Bartzelonaren kontra, eguerdiko 12:00etan Landaren. Finalerako pasea lortzea da ilusioa.