Telmo Esnal zuzendari zarauztarraren Dantza pelikula arrakastatsua ostiralean etorriko da Biteri kultur etxera, 22:30etan. Orain dela lau aste estreinatu zen eta herriz herri dabil estreinaldietan. Hernaniko kultur etxera etzi etorriko da eta asteburuan eta astelehenean ere eskainiko da betiko orduetan. Hau da larunbatean, 19:30 eta 22:30etan; igandean, 19:30etan; eta astelehenean, 16:30etan.
Irailean estreinatu zuten, Donostiako Zinemaldiaren sail ofizialaren barruan, eta Telmo Esnalen, Koldobika Jauregiren eta Juan Antonio Urbeltzen arteko elkarlanaren emaitza da pelikula.
Pelikulan 250 dantzari baino gehiagok hartu dute parte. Greenpeace-n Lurra Saria ere irabazi du filmak eta kritika oso onak jaso ditu.
Telmo Esnalek dio istorio nahiko xumea dela. «Herri laborari baten istorioa, fruituaren inguruan; lanak fruitua dakar, fruituak festa… Horren gainekoa da, nahiko sinplea. Egin dudana da dantzak kokatu eta erabaki zer dantzarekin kontatu nezakeen istorioa; erabaki zein lekutan jarri dantza bakoitza, nire ildo narratiboari laguntzeko. Ez dauka hitzik, beraz, argi nuen bisualki interesgarria eta erakargarria behar zuela izan. Pelikula dantzatu bat da, dantzaz dantza istorioa kontatuko duena».