Erremonteko Master Torneoa bihar hasiko da jokatzen Galarretan. Banakako txapelketa izaten da eta bederatzigarren edizioa beteko du aurten. 2019koan sei erremontistek hartuko dute parte, inoiz baino gehiagok, eta bost partidu jokatuko dira guztira. Eskailera formatua izango du.
Bihar, lehenengo partidua
Biharko lehenengo partiduan Azpiroz eta Endika ariko dira elkarren aurka. Bigarren partiduan, larunbatean, Ezkurra II eta Barrenetxea IV lehiatuko dira bata bestearen kontra. Lehenengo partiduaren irabazleak Urriza izango du aurrez aurre urtarrilaren 17an eta bigarren partiduko irabazleak Uterga hartuko du urtarrilaren 19an. Finala, urtarrilaren 26an jokatuko da finalerdieetako irabazleen artean.
Koteto Ezkurra haundiak irabazi zituen lehendabiziko bi edizioak 2011an eta 2012an. Ondoren, Urrizaren bi garaipen etorri ziren (2013 eta 2014), Utergak hartu zuen erreleboa 2015ean eta 2016an beste bi garaipenekin eta azken bi urteetan berriz ere Urrizak menderatu ditu aurkariak. Urriza txapeldunak aurkezpenean azaldu zuen banakako txapelketetan motibazio berezia duela eta exijentzi maila, aurkari berriak eta erronka haundia izaten direla. Endika Barrenetxearen hitzetan «gazteak indartsu datoz; bai Ezkurra II eta bai Azpiroz, eta datorren urtean ea gazte gehiago dauden».
Aurten, UTS-Komunikazioa da babeslea eta bere izena du txapelketak.