GURE Artean Euskaraz mintzapraktika egitasmoan arazoak daude taldeak osatzeko, laguntzaile/boluntario faltagatik. Aurten, Euskaltzaleen Topaguneak egindako Egin jauzi! kanpainarekin bat egin du, eta ondorioz, 20 bat lagun berrik eman dute izena egitasmoan, mintzapraktika egin eta euskara praktikatzeko asmoz. Baina, laguntzaile/boluntario falta dela eta, oraindik ezin izan dira taldeak osatu.
Dakienak ez dakienari laguntzea da muina
Hori horrela, Dobera Euskara Elkartean, euskaldun eskuzabalen bila dabiltza. Egitasmoaren muina elkarri laguntzea da; dakienak ez dakienari laguntzea, alegia. Egitasmoan parte hartzen dutenak talde txikietan biltzen dira, hiruzpalau kidez osatutakoak.
Astean behin ordubetez
Astean behin, ordubetez aritzen dira euskaraz hitz egiten. Tartean, noski, hizkuntza menperatzen duen pertsona bat izaten da laguntzaile moduan. Gainerako taldekideek euskara praktikatzea bilatzen dute; segurtasuna irabazteko, lotsa galtzeko edo hizkuntza maila hobetzeko, besteak beste. Nola egin, noiz eta non bildu... hori taldeak erabakitzen du.
Laguntzaile/boluntario bezala aritzeko, ez da ezinbestekoa euskararen gramatika edo Euskaltzaindiaren arauak jakitea.
Euskaraz egiteko erraztasuna eta erraztasunik ez dutenei laguntzeko gogoa besterik ez dira behar.