Umore Ona pilota txapelketako finalerdiak jokatu berri dira. Atzo arratsaldean jokatu ziren bost finalerdi eta pasa den abenduaren 28an lehendabiziko hiruren txanda izan zen.
Atzoko emaitzak oraindik jakiteke, Kronika atzo itxi zenean oraindik ere partiduak jokatzen ari ziren, Goizuetak izanen du ordazkaritza finalean. Kimu mailan, Xanet Apezetxeak, Epleko Etxeberriarekin, 18-9 gainditu zituzten Hernaniko Pascual eta Azpeitia, pasa den astean. Beraz, Apezetxea goizuetarra finalean egonen da datorren urtarrilaren 13an, igandean. Beste bi goizuetarrek, Legarreta eta Elizegik, atzo jokatu zuten beraien finalerdia Hernaniko Deskarga eta Alegriaren kontra, haurren mailan. Haurren mailako bi finalerdiak jokatu ziren atzo.
Xanet Apezetxea goizuetarra finalera sailkatu da kimuetan Epleko Etxeberriarekin bikote osatuz
Beste mailetan, umeetan Epleko Iturain eta Bergara finalean dira. Eta 22 urtez azpikoetan Andoaingo Etxezarreta eta Arratek Goizuetako Aizkorbe eta Apezetxea kanporatu zituzten finalera sailkatuz.
Azaroaren 30ean hasi zen txapelketa eta datorren igandean, urtarrilaren 13an, amaituko da lau finalekin. Maila ona eta partidu ederrak ikusi dira aurtengo pilota txapelketan.