«Inolako alderdi politikorekin loturarik gabeko» hainbat astigartar biltzen dira Plataforma A+ elkartean, eta «modu informalean 400 sinaduratik gora» bildu dituztela jakinarazi dute, udaletxeari eskatzeko animalien babeserako araudia hobetzeko; «1.000 txakur inguru dago egun erroldatuta».
Abenduaren 14an egin zuten bilketa, «bizilagun, taberna eta komertzioetako elkarlanari esker», eta egun horretan bertan, Joseba Barandiaran plazan bildu eta 25 txakur inguruk lagunduta udaletxera gerturatu ziren, sindaurak alkateari eta udaltzain buruari eramatera; «biak bertan egotea eskertzen dugu, lan ordutegitik kanpo sinadurak biltzeagatik», azaldu dute.
Proposamenen zain
Ekintza honekin «egungo egoera onartezina ikusarazi» nahi izan dute, eta era berean, «beste kolektibo batzuekin bat» egin dute, «udaletxeari eskatzeko, dagoena dagoela, eta alderdi guztiak arduradun eginez, animalien babeserako araudiaren hobekuntza erreal eta eraginkorra».
Era berean, gogorarazi nahi izan dute badirela «gai sozialetan premiazko beharrak, oso premiazkoak, bizilagun gehienon ustez, animalistak izan edo ez, garrantzitsuagoak direnak. Horregatik, eskatzen dugu jarrera profesional eta serioa, liskarretatik aldendua; ideiak eta hobekuntza proposamenak egingo ditugu, baina era berean, zuen proposamenak espero ditugu, ahal dela, idatziak eta lotesleak».
Apirilean, festa
Egindako eskaera horien berri emateaz gain, taldeak jakinarazi du apirilaren 27 eta 28an jaialdi animalista antolatzekoak direla Astigarragan, eta parte hartzera animatu dituzte herritar guztiak, «animalien babeserako gaien inguruan hezi eta kontzientzia sortzeko».
Interesa duen edonor jarri daiteke harremanetan taldearekin: p.animalista.astigarraga@gmail.com.